Hashi nukkassaatinik atornerluisartut allattorsimaffianiit peerneqartussanngorunarpoq
Ikiaroornartoq hashi timersortartut nukkassaatinik atornerluisartut allattorsimaffiiannit peerneqartussanngorunarpoq.
Anti Doping Danmark, tassa nukkassaatinik aamma qasujaallisaatinik atuinermut Danmarkimi akiuiniaqatigiiffiup, timersortartut tamakkulu kattuffiisa nukkassaatinik atuinnginnissamik nunat tamalaat malittarisassaata, 2015-imi atuutilersussap, WADA-llu - tassa nukkassaatinik atuinnginnissamik nunat tamalaat malittarisassaat - maanna tusarniaassutigalugu oqaloqatigiissutigaat, tamanna Atuagagdliutini ullumi saqqummersuni allaaserineqarpoq.
Stoffi, imaluunniit periuseq, Nukkassaatinut Allattorsimaffimmi ilaassappata, tamatigut angusaqarnermut siuarsaataassasut, allannguutissatut siunnersuutit ilagaat, tamatumalu saniatigut peqqinnermut ajoqutaassasut, imaluunniit timersornerup anersaavanut akerliullutik.
Malittarisassani allannguutissaq taanna Anti Doping Danmarkip ukiorpassuarni kissaatigaa, eqqortumillu alloriarnertut isigaat, nukkassaatinik atuinermik akiuinermi atugassarisat sammineqarnissaat kissaatigigamikku.
Hashi inerteqqutaavoq, peqqinnartuunanilu, timersornermulli atatillugu aanngajaarniut taanna angusarissaarnissamut siuarsaataanngilaq.
Hashitorneq Kalaallit Nunaanni siusinnerusukkut pineqaatissiissutaareerpoq.
