Hashi meeqqap ineriartorneranut akornusiisarpoq

Anaanat atornerluisuusut ernunamanartumik amerlassuseqartut Peqqinnissaqarfimmi nunatsinni katsorsaaviit annersaasa ilaanni naammattoorneqartartut qanittukkut oqaluttuaraarput.
Danmakimilu tamatuminnga ilisimasaqarnerpaat ilaat maanna oqaluttuarpoq, taama atornerluineq meeqqap angajoqqaallu attaqatigiinnerisa ajornerulerneranik, meeqqat arriinnerusumik  ineriartornerannik aammalu puallukulanerujussuunerannik, bronkitiseqakulanerujussuunerannik kiisalu siutimik iluatigut aseruuttuukulanerujusuunerannik kinguneqarsinnaavoq.

- Hash naartup alliartornissaanut akornutaavoq. Meeqqap angajoqqaaminut attaveqarnera hashimit ajornerulersinneqartarpoq. Meeqqap eqqarsartarnikkut ineriartornera hashimit kinguarsarneqartarpoq. Meeqqat hashimik peqquteqartumik puallukulanerujussuullutik, bronkitiseqakulanerujussuullutik siutimik iluatigut aseruuttuukulanerujusuupput.

Anaanaalluni hashimik pujortartaraanni, naartuumut inunngorlaamulluunniit uloriasutsitsissutaasartut tamakkua ilaagigaat nakorsaaneq May Olofsson taama ilisimatitsivoq.

Taanna Region Hovedstadenimi ilaqutariit saaffiginnittarfianni meeqqallu aanngajaarniutinik ajoquserneqarsinnaanerannut pinaveersaartitsinissamut ilisimasaqarfimmi pisortaavoq.

Ilaqutariinnut saaffiginnittarfik naartusunut ilaqutariinnullu, mikisunik meerartalinnut, imigassamik aangajaarniutinillu allanik atornerluisunut neqeroorutaavoq.

Meeqqat Sanami novembarip qiteqqunneraniit januaarip naaneranut inunngortut 15 procentiisa arnaat hashimik atornerluisuupput.

Meeqqat inunngorlaat hashimik kingunerlutitsisut napparsimmavimmi sulisunit naammattorneqakulapput. Meeqqat taamaakkangamik sorusussuseqarneq ajorput, nukillaangallutik, iluamik nererusungatik, milulluarsinnaanatik, ilaallu sullulikkut aatsaat nerisitsineqarsinaasarlutik.

- Tassalu meeqqanut allanut naleqqiullutik timikkut tarnikkullu arrinnerusumik ingerlalluarleriartortarput. Aammalu meeraq sorusussuseqanngikkuni  nukillaangallunilu
taava meeqqanut peqqissunut eqiingasunullu naleqqiullutik anaanamut ataatamullu attaveqalerniarnerat ajornarnerussaaq. Aamma ilisimatusarnermit ilisimaneqarpoq, meeraaqqat angajoqqaaminnut attaveqarnerat, meeqqap ineriartorneranut pingaaruteqartorujssuusoq, May Olofsson nassuiaavoq.

Taassuma nakorsanermini ukiut 30-it sinnerlugit, meeqqanut ilaqutariinnullu ernumanartorsiortunut sulinermut atorsimavai.

Nangilluni oqaluttuarpoq, haship naartunut meeraaqqanullu sunniutai pillugit ilisimatusarnikkut paasisat killeqaqisut. Kisiannimi paasisaqartoqareerpoq:

- Naluneqanngilaq, meeqqap samminnissinnaassusia, ukkissilluarsinnaassusia, oqaatsimigut ineriartornera allarpassuillu, meeraq inunngutsiaannartoq aallartittartut.
Meerarlu inunnguliinnarluni hashimik sunnerneqarsimappat, taassuma ineriartornissaa kinguarsarneqassaaq taamaalillunilu ajoquserneqarluni, meeraq ajortumik ineriartortilerlugu, May Olofsson oqarpoq.

Anaanaasullu hashimik atuineratigut sunniutit ajoqutaasut, meeqqat inunngorneratigut ununneq ajorput. Hashimi anaanaasup immunanut ingerlaqqittarpoq:

- Tassalu ajornartorsiutaavoq, hash anaanap immuaniit kaangartarmat, soorlu akuutissat allarpassuit taamaattartut. Uanili allaanerussutaavoq, hash arnap immuaniittoq arnap aavaniittuminngaanniit arfineq pingasoriaammik sakkortunerusarpoq. Naalungiarsullumi miluttoq tamatuminnga sunnerneqartarpoq, May Olofsson oqarpoq.

Meeraaqqalli milunnerinnarmikkut hashimik peqquteqartumik napparsimalernissamut ulorianartorsiorneq ajorput. Aamma hashimik pujoorfigitinnermikkut puallunnissamut bronkitisernissamut siutillu iluatigut aseruuttoornissamut ulorianartorsiornerat tupamik pujoorfigitinnikkut uloriatartorsiornerannit arfineq pingasoriaammik annerusoq, nakorsaaneq nangilluni oqaluttuarpoq.