Hashi aatsaat taama annertutigisoq arsaarinnissutigineqarpoq

Hashi 118 kiilu tissiartaammiittoq politiinit arsaarinnissutigineqartoq, politiit ikiaroornartoq pillugu paasiniaasartuisa siuttuata ullumi nalunaarutigaa. Angutit Danmarkimeersut marluk sapaatip-akunnerini sisamani tigummigallagassanngortinneqarput, pinngitsuunerarpulli.
Allattoq Mads Lynge
juulip 23-at 2009 12:42

Politiit tissiartaammi 35 fodsitut angitigisumi hashimik nassaarneranni Kalaallit Nunaanni aatsaat taama annertutigisumik nassaartoqarpoq.

Ikiaroornartut aqqartartut atortuisa arfinillit iluanni ilaatigut toqqorneqarsimapput.

Aqqartartut atortuisa naqqi immikkut suliaasimapput ammarsinnaanngorlugit, tamarmillu immikkut 13 kiilumik imaqarsinnaallutik.

Tissiartaat sinerissamik nakkutilliissummit Ejnar Nikkelsenimit juulip qulingani ikiorserneqarnermigut Qaqortup umiarsualivianut talissinnaasimavoq, politiinillu kingorna misissuiffigineqarluni.

Hashi taama annertutigisoq anngiortumik tuniniarneqarsimasuugaluarpat 60 millioni koruuninik isertitsissutaasimasinnaagaluartoq politiit eqqoriarpaat.

Angutit marluk tissiartaammiittut pinngitsuunerarput, sapaatilli-akunneri sisimat tigummigallagassanngortinneqarlutik.

Suliaq politiinit suli suliarineqarmat inunnik allanik tigusaasoqarsimanersoq politiit ilisimatitsissutigerusunngilaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq