Hashi 43 kilo siorna arsaarinnissutigineqarpoq

Ikiaroornartunut tunngasunut suliassat politiinit suliarineqartut amerliartoraluartut, ikiaroornartoq hash politiinit siorna arsaarinnissutigineqartoq ukiut siuliinut naleqqiullugu annikillerialaarpoq. Politiit ukiumoortumik nalunaarutaanni tamanna atuarneqarsinnaavoq.
Allattoq Mads Lynge
juulip 03-at 2009 07:59

Hashi 43 kiilu politiinit siorna arsaarinnissutigineqarpoq, 2007-imut naleqqiullugu annikinnerulaarluni, ikiaroornartoq 48 kiilu taamanikkut arsaarinnissutigineqarmat.

Siorna arsaarinnissutigineqartut ikilerialaaraluartut aningaasat arsaarinnissutigineqartut amerlerialaarput.

Aningaasat ikiaroornartunik tuniniaanermi isertitat politiinillu arsaarinnissutaasut siorna 3,9 millionit koruuniupput, 2007-imi 3,4 millionit koruunit politiinit arsaarinnissutaallutik.

- Ikiaroornartut Kalaallit Nunaannut eqquteriarneqartartut ilaat Københavnimi Kastrupip mittarfissuani arsaarinnissutigineqartarput. Taamaammat tamanna ukiumoortumik nalunaarusiatsinni ilaanngilaq, politiit ikiaroornartut pillugit paasiniaasartuisa pisortaat, Finn Jeppesen, Radioaviisimut oqarpoq.

Ikiaroornartut pillugit politiinut suliakkiissutit ataatsimut isigalugit amerliartuaarput, suliat katillugit siorna 551-iummata.

Politiinut suliakkiissutit Danmarkimut naleqqiullugit aamma amerlanerupput. Tassami inuit Kalaallit Nunaanni 10.000-iugaangata suliakkiissutit agguaqatigiissillugit 86-iusarput, Danmarkimi 28-usartut.

Politiit ikiaroornartut pillugit paasiniaasartui katillugit tallimaapput, politiitut ilinniarsimasut sisamat, ilinniartorlu ataaseq ilinniarnerminut atatillugu paasiniaasartuni sulisarami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq