Tukuma Arctica sulisut umiarsuarmi eqqumiitsumik nassaarisaqarnertik pissutigalugu namminneerlutik akileraaruserisunut ilisimatitsisimapput.Assi: KNR/Anton Gundersen Lihn

Hashi 12 millionit koruuninik nalilik RAL-ip umiarsuaani nassaarineqartoq

Kalaallit Nunaanni Politiit hashi 12 kiilu tuniniaraanni 6 millionit aamma 12 millionit koruunit akornanni naleqartoq Royal Arctic Linep umiarsuaani Tukuma Arcticami nassaarineqarpoq.

RAL-ip umiarsuaata Tukuma Arcticap usiani nalinginnaanngitsumik inerteqqutaasumillu siorna 2022-mi novembarip 25-ani nassaartoqarpoq.

- Tukama Arcticap Nuummut tikinnerani paasineqarpoq tassani hashimik eqqusseriaraluartoqarsimasoq, tunuatungaanut ikkussilluni, tassani tunuatungaanut ikkunneqarsimammat karsi hashimik imalik, misissueqqissaarnermi aqutsisoq, politikommissæri, Malik Sangreen KNR-imut oqarpoq.

Umiarsuaq containerinik useqartoq Nuummut tulaqqammersoq politiit hashi 12 kiilumit minnerunngitsoq tuniniarneqarunilu millionerpassuarnik naleqartussaasoq nassaaraat.

- Hashi tuniniarneqaruni 6 millionit koruunit imaluunniit 12 millionit koruunit nalinganik akeqartussaagaluarpoq, Malik Sandgreen oqarpoq.

Umiarsuit anngiortumik nunatsinnut eqqussuinermi atorneqartarnerat nutaarsiassaanngilaq.

Danskit akileraartarnermut oqartussaasuisa Royal Greenlandip kilisaataataani Avatami hashi 21 kiilu 2022-mi juunip 13-iani nassaaraat.

AAMMA ATUARUK Royal Greenland: Umiarsuatta eqqusseriaraluarnermut atorneqarnera nuanniippoq

Sulisut akileraaruserisunut namminneq attaveqartut

Umiarsuarmi sulisut umiarsuarmi eqqumiitsumik nassaarisaqarnertik pissutigalugu namminneerlutik akileraaruserisunut ilisimatitsisimasut politikommissærip paasissutissiissutigaa.

- Umiarsuarmi sulisut paasisimagamikku eqqunngitsoqartoq tassanilu ilanngaaserisut nalunaarfigisimavaat.

Suliamut atatillugu tigusarinnittoqarsimanngitsoq annerusumillu oqaaseqarsinnaanatik taassuma oqaatigaa.

- Suliami tigusarisaqanngilagut, misissuisoqarneralu pissutigalugu politiinit maannamut allanik paasissutissaateqanngillat, Malik Sandgreen oqarpoq.

KNR-ip Royal Arctic Line suliamut atatillugu attaviginiaraluarpaa iluatsinnaguli.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl