Hash inuiaqatigiinni akuerisaavoq
![](/sites/default/files/styles/image_934x467/public/article_images/hash630_3.jpg?itok=Ld7dFLLI)
Katsorsaavimmi Nuummiittumi imigassamik hash-imik aningaasanoornermillu pinngitsuuisinnaanngitsunik ukiumut 75-nik katsorsartittoqartarpoq. Taakkunannga qulit missaaniittut naartuusut imaluunniit erneqqammersut ukiumut qulit katsorsartittarput, piffissap ilaani qanigisaasut aamma katsorsartittarlutik.
Naartusut erneqqammersulluunniit peqqinnissaqarfiup suliniutaannit naartusut siusinaarluni iliuuseqartarnerannit katsorsartinnissaannut innersuunneqartarput.
- Ukiut kingullit marluk pingasut naartusut erneqqammersullu katsorsartittut amerliartorput, Grethe Kramer Berthelsen oqarpoq. Taassuma naatsorsuutigaa naartusut meerartaaqqammersulluunniit suli amerlanerusut hashimik atuisuussasut.
- Ukiumut qulit katsorsartittut amerlapput, immaqa amerlanerusut atuisuupput katsorsartissimanngitsullu, taamaakkaluartoq qujanarpoq katsorsartikkumasut qulit anguneqarsinnaammata, Grethe Kramer Berthelsen oqarpoq.
Grethe Kramer Berthelsen ukiuni 13-ni katsorsaasutut sulivoq, sulinermini naartusut meerartaaqqammersullu ikiaroornartumik hashimik atuisut tassaanerunerarpai, hashinik imigassamilluunniit atuisuinik angajoqqaaqarlutik peroriartortut.
Naartusut meerartaaqqammersulluunniit haship uloriartuunginneranik oqarfigineqartarsinnaanerat Grethe Kramerip Berthelsenip ilimagivaa.
Soorlu anaanasup panini oqarfigisimasinnnaavaa" Illit naartugalutit hashitortarpunga illit akornutiginngilat" ikiaroornartup haship ulorianartuuneranik inuiaqatigiinni oqariartuutigineqarpoq paasisitsiniutigineqarlunilu, illuatungaanilu ilaqutaasut haship ulorianartuunnginneranik oqartarnerat meeraasa upperinerulertaraat, Grethe Kramer Berthelsen isumaqarpoq.
Sapaatip akunnnerani kingullermi oqaluttuaraarput Nuummi Dronning Ingridip napparsimavissuata ernisarfiani qaammatini kingullerni marlunni ernisut 15 procentii ikiaroornartumik hash-imik atuisuusut.
Soormitaavana Kalaallit Nunaanni ikioaroornerumik hash-imik atuisut taamak amerlatigisut?
- Ikiaroornartoq hash pillugu akuersaarpallaalersimavugut. Haship inerteqqutaanera tamatta nalunngilarput inuiaqatigiinnili haship atugaanera nalinginnaasutut isigineqalersimavoq akuerisutullu illugu, Grethe Kramer Berthelsen oqarpoq.
Ikiaroornartup haship ulorianartuunera pillugu paasititsiniaaneq naammanngitsoq Grethe Kramer Berthelsen isumaqarpoq.
- Paasisitsiniaaneq annikippallaarpoq, ernisussamut paasisitsiniaanerit juumuup isumagisussaavaa, kisianni inuiaqatigiinnut meeqqanut annerusumik paasisitsiniutigineqarnissaa pisariaqartoq, Grethe K. Berthelsen oqarpoq.
Naartusut erneqqammersulluunniit katsorsartittut pingajorarterutaat katsorsartinnertik iluatsittarpaat. Aammali ilaqarput katsorsartinnerminnik iluatsitsinngitsut. Tassunga pissutaavoq katsorsartittup katsorsartinnini naammassigaangat avatangiisiminut hashimik atuisuusunut uteraangamik atuisuunertik aallarteqqittaramikku.
- Ileqqoq, hashimik atuisuuneq, ilaqutariinni kinguariinni atugaasoq allanngortikkuminaattarpoq, taamaattumillu katsorsartittup katsorsartinnermi kingorna kisimiilluni atuisuujunnaarnissani ajornartorsiutigisarpai, Nuummi Katsorsaavimmi katsorsaasoq Grethe Kramer Berthelsen oqarpoq.