Hash imigassarlu samminerussavaat

Inuuneritta siullermi, Naalakkkersuisut amerlaqisunik suliniutinik, tassa qulingiluuasunik ingerlatsipput.

- Imigassaq ikiaroornartorlu akiorniarlugit sulinerput pitsanngorsarusupparput, taava aamma meeqqat, inuusuttut ilaqutariillu atugaannut sammitinnersuniarparput, kiisalu inooriaatsitsinnut peqqinnerunermullu sammitinniarlugu, Naalakkersuisut ukiuni tallimani tulliuttuni, suliniutit ikinnerusut aallunniagaat pillugit Peqqissutsimut Naalakersuisoq, Agathe Fontain, taama oqarpoq.

Tassalu Inuunerittami innuttaasut peqqinnerulernissaannut maannakkumut suliniutinit ikinneerarsuarnik aallussisoqassasoq, taanna oqarpoq.

Taamaalillunilu innuttaasut peqqissuunissaannut suliniutip Inuunerittap
siorna novembarimi nalilersorneqarnerani isornartorsiutaangaatsiartut tigulluarpai.

Tassami nalilersuisut isumaqaramik, ataqatigiissaarineq amigaataasoq, ingerlatsiviit aalajangersimasut ikippallaartut, sullissisut ilinniartitaanerat ajorpallaartoq minnerunngitsumillu aningaasanik naammattunik atuagassaqartitaannginneq aporfiusoq.

Isornartorsiuisullu ilaat, Nuummi ataatsimiinnermi ima oqarpoq:

- Suliniterpassuit amerlagaluaqaat, suliniutilli sorliit iluaqutaanersut nassaarinissaat unamminartuuvoq. Professori issittumi innuttaasut peqqissusaannik immikkut sulialik, Statens Institut for folkesundhedimeersoq, Peter Bjerregaard taama oqarpoq.

Innuttaasut peqqissuunissaannut suliniummi, ukiup matuma naanerani qaangiuttussami, suliniuteqarfigineqartut qulingiluat tassaapput: Imigassaq ikiaroornartorlu, persuttaanerit kinguaassiuutitigut atornerluinerit, imminortarneq, nerisaqarneq timimillu aalatitsineq, atoqatigiinneq, pujortarneq, meeqqat inuusuttullu, utoqqaat kiisalu kigutinik isumaginninneq.

Kommuunillu Naalakkersuisunut suleqatiginninnissaminnut piaareersimasut, borgmester Simon Simonsen oqarpoq. Tikkuartuutigaalu kommuunini ilaatigut ilaqutaariinnut sullissiviit sumiiffinni sulinermi ingerlatsiviulersinnaasut.

- Innuttaasunut qanimut iliuuseqartitsinerit suleqateqarnerillu, aallunneqarnerusariaqarput aammalu soorunami paasititsiniaanerit, qanoq ililluni inuunerinnerusinnaanermut ingerlanneqartut annertusarneqarnissaat kissaatiginarput tamatsinnut, Kommuuni Kujallermi borgmesteri, Simon Simonsen taama oqarpoq.

Peqqissutsimut Naalakkersuisoqarfimmi pisortaq, Ann Birkekær Kjeldsen, KNR-mut  ilisimatitsivoq, sammisat suliniutigineqartut sinneruttut peqqinnissaqarfimmit ingerlanneqalissasut.