Hash 200 grammi kilisaammi nassaarineqarpoq

Qimmit ikiaroornartumik ujaasisartut naamallaqqeqaat. Qaqorsaatisunni hvidløg-isunnilu iluaqutaanngivissorput, raajarniummi Kalaallit Nunaanninngaaneersumi, Fredericiami umiarsualiorfimmi iluarsaatsittumi, ikiaroornartoq hashi 200 grammi, plasticposimut poorlugu errortanut qaqorsaataasivimmut 1 meterisut portutigisumut ikineqarsimasoq, nassaarineqarmat.
juulip 11-at 2008 10:47

Kilisaat Kalaallit Nunaannukartinnagu akitsuuserisunit ikiaroornartumik naamasartunik marlunnik qimmilinnit ippassaanikkunni misissuiffigineqarpoq. Akitsuuserisoq qimmimit peqquneqarporlusooq qaqorsaataasivimmut ikeqqullugu, ikiaroornartorlu qaqorsaataasiviup naqqaniit kinguninngua ammunneqarpoq, arsaarinnissutigineqarlunilu.

Ikiaroornartoq immaqa naamaneqarsinnaaqqunagu hvidløgimerngit arlallit plasticposimut aamma ikineqarsimapput, Vejlemi aviisimi, Vejle Amts Folkebladimi taama allaaserinnittoqarpoq.

-Kalaallit Nunaannut nassiussassat misissortarniarlugit Namminersornerullutik Oqartussat Danmarkimilu naalakkersuisut suleqatigiinnissamik isumaqatigiissuteqarnikupput. Siunertaavoq ikiaroornartumik Kalaallit Nunaannut eqqussisarnerup unitsinneqarnissaa, Middelfartimi Akileraarnermut

Pisortaqarfimmi immikkoortortaqarfimmi pisortaq, Carl Andersen aviisimut oqarpoq.

-Umiarsuit umiarsualiorfimmi iluarsaatsittussat tikinnissartik nalunaarutigisartussaavaat, sapinngisamillu amerlanerit misissortarpavut, nassaartarnerpulli qaqutigoorpoq, Carl Andersen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq