Hash 118 kiilu pillugu misissueqqissaarneq suli ingerlavoq
Angutit marluk tissiartaammut 35 fodsimut ilaallutik hashimik 118 kiilumik eqqusseriaraluarlutik Politiinit juulimi tigusarineqartut, tigummigallagaanerat sapaatip akunnerinik sisamanik sivitsorneqaqqippoq, Politiit eqqartuussissuserisuat Henrik Pass ilisimatitsivoq.
Allattoq Oline I. Olsen
- Misissueqqissaarnerit suli ingerlanneqarput, aamma unnerluussinissamut apeqqut suli eqqartunngilarput, Henrik Pass oqarpoq. Suliamut atatillugu allanik tigusaasoqarnersoq pillugu taanna oqaaseqarusunngilaq.
Angutit marluk tigummigallagaanerat aggustip qulingannut sivitsorneqarpoq, taamaalillunilu Politiit misissuinerat sivitsorneqarluni.