Harry Potter and the Deathly Hallows saqqummersinneqalerpoq

Atuakkiortup Joanne K. Rowlingip atuakkiai meerarpassuarnit inuusuttuararpassuarnillu ilisimaneqarluarput, tassa Harry Potter Rowlingip atuakkiaani pingaarnertut inuttaasarmat.

Angakkumullu taassumunnga atuakkiat arfineq-aappassaat unnuaru saqqummersinneqartussaammat inuusuttararpassuit pissangarrapput.

Tuluit nalunaaqutaat malillugu unnuaru unnua’qeqqa qaangilaannguaraa Harry Potter-imut tunngasoq atuakkiaq kingulleq saqqummersinneqassaaq. Atuakkiaq tuluttuunngorlugu atserneqarsimavoq ”Harry Potter and the Deathly Hallows”.

Atuagaarniarfiit Europamiittut ulloq naallugu unnuarulu ataatsip tungaanut ammaniarput, atuakkiap saqqummersinneqarnissaa utaqqimaarniarlugu.

- Atuakkiamut ataatsimut tunngatillugu aatsaat taama uivernersuaqartigisoq misigaara, inuuninnilu misigeqqikkunanngilara, Politikenip atuagaarniarfiani aqutsisoq Suzanne Marklund oqarpoq, nangillunilu:

- Atuakkanik naqiterisitsisarfimmiit aatsaat taama sukannertigisumik piumaffigineqarpugut, atuakkiallu saqqummersinneqareerpallu aatsaat karsit ammassagivut atsioqatigiissutigaarput, taamaammat atuakkiap saqqaa suli takunngilarput, Suzanne Marklund oqarpoq.