Harperip issittumi angalanera aallartinnerliorpoq
Ministeriuneq Harper ministerini arlallit peqatigalugit ippassaq Iqalunnut tikippoq. Angalaneq avammut nittarsaassinertut eqqarsaataasimagaluarpoq, Canada nunanut issittunut ilumut soqutiginnittoq pingaartumillu nunat taakkua Canadamut pingaarutilimmik ilaanerat takutinniarlugu.
Imaattussaasimagaluarpoq sakkutuut takutitsinersuat Nanook maannakkorpiaq pisoq sammineqassasoq.
Iqaluit sakkutuunik, sakkutuut timmisartuinik sakkutuunillu imarsiortunik ulikkaarpoq. Imaattussaasimagaluarpoq Harper taakkuninnga assiliseqateqassasoq, taamaalillutik kikkut tamarmik, kiisalu Ruslandip, Danmarkip USA-llu takusinnaaniassammassuk Canada nunanik issittunik qanoq pitsaatigisumik illersuinersoq.
Taamaalisoqanngilarli. Sap. akunnerani kingullermi Iqalunni brugsenip eqqaani eqqaaviit tunuanni nukappiaqqanik qulinik ukiulinnik marlunnik unnuami taarsineq ajortumi nunaannarmi sinittunik assilissat marluk saqqummiunneqarput. Tusagassiuutinit, aammattaarlumi Iqaluit borgmesteriannit, taakkua sammineqarnerupput.
Borgmester Elisapee Sheutiapiup Harper naapikkamiuk taakkua oqaluuserai, tassalu inuusuttut Iqalunniinnaanngitsoq Nunavumili tamarmi qanoq iliorneqassanersut. Qanoq iliortariaqarneq pillugu nalunaarusiat imaaginnavipput, qanoq iliuuseqarfiginissaali arriippallaarujussuarmik ingerlanneqarluni.
Taava maanna aamma puulukit nappaataat ulorianartorsiortitsivoq, Nunavumilu sillimasoqartariaqarnera piareersimaffigineqarani, taamaalillunilu Harperip nunami issittumi angalaarnermini ajornartorsiutit allat isumagisariaqarlugit.
