Harper: Avatangiisit ajornartorsiutaanerisa ineriartorneq unitsissanngilaat

Ministeriunerup Canadap issittortaani inuttaasut ataatsimeeqatiginiarlugit aasaanerani angalasarnermi arfinilissaat ingerlateqqammerpaa.

Stephen Harper Nunavummi Qaamanersuarmut sapaatip akunnerani kingullermi tikeraarpoq - tassani uranimik piianissaq pilersaarutaavoq.
Kuultimik maanna piiasoqaareerpoq. Uranimilli  piiasinnaanermut pilersaarummut nunaqarfimmiut isumaat assigiinngillat.

Qaamanersuarmi Meadowbankimi kuultinik piiasut Harperip oqaloqatigai. Tassani oqaloqateqarnermini kuultimik piiaanermi eqqagassat tatsimut aalisagarpassualimmut nunaqarfiup eqqaanittumut iginneqartarnissaannik naalakkersuisut akuersisimanerat Harperip illersorpaa.

- Maani assaasoqarpat, avatangiisinut soorunami ajornartorsiuteqalissaaq. Tamakkualu uagut isumagiumaarpavut, kisianni ajornartorsiutit ineriartorneq unitsissanngilaat, soorlu Montrealimi, Torontomi Vancouverimiluunniit ineriartornermut unitsitsitsisuutinngikkivut, ministeriuneq Stephen Harper oqarpoq.

Qaamanersuarmi innutaasut Canadap sinnerani innuttaasut assigalugit ineriartornissaminnt pisinnaatitaaffeqartut aningaasarsiornissamullu periarfissaqartitaasut, Harper aviisimi Globe and Mailimi apersorneqarluni oqarsimavoq.

Harper Qaamanersuarmeereeerami Yellowknifemut tikeraarpoq. Tassaniinermini Canadap issottortaani pingaasuni naalakkersuisut siulittaasui ataatsimeeqatigai. Ataatsimiinermi tassani Canadap avannaarsuarni peqqinnissamut suliniutit annertusarneqarnerat saqqummiuppai.

Tassalu Nunavummi, Yukonimi Inuialunnilu ingammik tarnikkut peqqissutsimut nappatinullu katsorsarneqarsinnaanngitsunillu nappaatilinnut atukkanik pitsanngorsaanermut aningaasaliissutit ukiuni marlunni  300 milliuut koruuninik amerlineqassapput.

Ministeriunerup Canadap issittortaani angalanini naggaserpaa, issittumi nuna eqqissisimatitaq Yukonimiittoq tikeraarlugu.