Hardenbergip allaffeqarfissuarmi sulisut oqaaseqaqqunngilai
Hardenberg ippassaq unnukkut tusagassiorfinnut nalunaaruteqarluni allappoq, Namminersorlutik Oqartussat allaffeqarfiani sulisut taarseraannerat pillugu tusagassiorfiit annertuumik sammisaqarnerat Namminersorlutik Oqartussani allaffeqarfiup Naalakkersuisullu qanoq ilioriarnissaannik ajornakusoortitsisoq, inuit ataasiakkaat pillugit oqaaseqarusunnginnamik.
- Oqaaseqartoqarneq ajorpoq assersuutigalugu inuit ataasiakkaat pillugit sulianut tunngatillugu paasissutissat inunnut ataasiakkaanut tunngasut tassani kalluarneqarsinnaammata, Svend Hardenberg allappoq.
Kikkunnik illersuiniarnersoq Naalakkersuisoqarfiup pisortaata tusagassiorfinnut nalunaarutaani ersersinneqanngilaq, Svend Hardenbergilli Namminersorlutik Oqartussani sulisut toqqaannanngikkaluartumik naalakkerpai allaffeqarfimmi pissutsinik isorisaqarunik nipangiutiinnartassagaat.
- Siunissaq eqqarsaatigalugu noqqaassutigissavara allaffeqarfimmi imminermi pisut pillugit paasissutissat, soorlu atorfinitsitsinermut/soraarsitsinermut tunngasut, pillugit saaffiginnissutit Naalakkersuisoqarfinnut pineqartunut ingerlatittarnissaat, Naalakkersuisoqarfinni ulluinnarni ingerlatsinermut taakku tunngammata, Svend Hardenberg allappoq nangillunilu:
- Neriorsuutigisinnaanngilara periuutsit allanngortinneqassasut, uannulli pingaarpoq apeqqut pineqartoq piaarnerpaamik pisortatut qullersat akornanni oqaluuseritissallugu, Naalakkersuisut siulittaasuata Naalakkersuisoqarfiani pisortaq, Svend Hardenberg naggasiivoq.
