Harald Biancop nannuttassat amerlineqaqqugai

Taassuma Tunumi nannunik kisitsisoqarnissaa 2010-mili apeqquteqaatigisarpaa.

Harald Biancop paragraf 37 naapertorlugu apeqquteqarluni, Tunumi nannuttassat amerlineqarnissaannik Naalakkersuisut pilersaaruteqarnersut paaserusuppaa.

Apeqqumminut tunngavilersuummini taanna allappoq, Tunumi 2013-imi nannunik kisitsisoqarnissaa Naalakkersuisunit neriorsuutigineqaraluartoq suli kisitsisoqanngitsoq. Tunumi nannut pisassiissutigineqartartut amerlissanersut imaluunniit ikilissanersut kisitsereernerup takussutississinnaagaa taassuma oqaatigaa.

Tunumi nannut amerliartortuarsinnartut taanna isumaqarpoq.

Sikorsuit ingerlaarnerisa allanngornerat tamatumalu kinguneranik nerisassakilliulernerannik peqquteqarsinnaaneranik Pinngortitaleriffimmit nassuiaatigineqartartoq, Harald Biancop oqaatigaa.

Taassuma Tasiilami eqqaanilu nannut takussaanerulernerat aamma maluginiaqquaa.
    
- Piniartut inuuniarnerminni aamma amianik akissarsiuteqarnerminni nannut tapertarilluinnarmatigik, oqaatigineqareersutullu amerliartornerat malunnarluinnarmat, Naalakkersuisut pisassanik ikinnerpaamik Tasiilamut qulinik aamma Illoqqortoormiunut qulinik amerlanerulersitsigaluarpata, tamanna nannut nungutaanissaannut navianartorsiortitsinavianngitsoq, IA-meersoq Harald Bianco allappoq.