Harald Bianco: Tunup Islandi suleqatiginerusariaqarpaa
Tasiilami mittarfiliornissamik siunnersuummik Naalakkersuisut itigartitsinerisa kingunerisaanik Tasiilami Tunullu sinnerani siuaritortoqaannarnissaa anguniarlugu periarfissanik allanik Harald Bianco ujartuivoq. Tasiilamimi mittarfeqannginnerata pissutigalugu Tunumiut akisuallaarujussuartumik qulimiguulinnik angalasariaqartarput, takornariallu angallannerup akisuallaarnea pissutigalugu aamma Kulusummuinnaq killittarlutik.
-Mittarfittaassaq allarpassuarnik aningaasarsiorfiulerumaartussanut aamma ammaassisussaavoq. Tasiilaq illoqarfinni inuttusiartortunut ilaavoq. Taassumaannaalluunnit takutippaa Tasiilaq sutigut tamatigut piorsartariaqartoq, aamma mittarfeqarnikkut, Harald Bianco oqarpoq.
Tunup aningaasarsiornikkut peiarfissaqarluarnera Islandimit eqqumaffigineqarpoq, Islandillu Tunullu akornanni timmisartukkut aamma attaveqarluni. Islandilumi Nunatsinni oqartussaasunut qaninnerusumik suleqateqarusulluni saaffiginnittarsimavoq akineqassananili.
- Tamanna Tunumiuusugut ilisimaarivarput, aamma eqqartortaqaarput, tassami kitaaniit ”soqutigineqanngikkutta” soormi Island suleqatigiinnarutsigu, sorusussuseqartoq siuarsaanissamilu aallartikkusukkaluartoq nalunnginnatsigu, Harald Bianco oqarpoq.