Harald Bianco: Tunumi nannut killilersugaajunnaarlik!
Taamaattumik Tunumi nannunik killilersuineq piaarnerpaamik unitsinneqartariaqartoq, Inatsisartunut ilaasortaq Harald Bianco, Inuit Ataqatigiinneersoq isumaqarpoq.
Taamaattumik § 36 najoqqutaralugu taanna Naalakkersuisunut apeqquteqaateqarpoq, matumani paaserusullugu, Naalakkersuisut Tunumi nannunik killilersuinermut siunissami qanoq pilersaaruteqarnersut paaserusullugu.
- Uagut Tunumi isumaqarpugut, nannut tappavani killilersorneqarnerat, kisitsisoqareernissaata tungaanut taamaatinneqartariaqartoq. Innuttaasut nannunit paatinnissamut ulorianartorsiorput, taamaattumik tamanna inuup inuuneranik naleqartinnagu aaqqiisoqartariaqarpoq, Harald Bianco Naalakkersuisunut apeqquteqamminini ilaatigut taama tunngavilersuivoq.
Aamma taassuma ilaatigut innersuussutigaa, piniartut arlalissuit takusarsimammatigik, sermit eqqaanni nannut katersuuffiini, nannut tuttutulli aqquteqalerlutik ingerlaarfeqartalersimasut.
- Tamakku ukiiffigineqassaartut ukiuni kingullerni 15-ini nanorpassuaqalersimassapput, Harald Bianco ilaatigut taama tunngavilersuivoq.