Hansip Qeqertaa suli pilernguppaat

Qeqertaq kilometerinik pingasunik takissusilik kilomerimillu ataatsimik silissusilik Kennedyp ikerasaani Kalaallit Nunaata Canadallu akornanniittoq, Hansip Qeqertaa, Danmarkimit Canadamillu assortuussutaajuartoq unammiuaarutigineqartuartorlu pingasunngormat misigisaqarfioqqippoq. Illersornissamut Canadami ministeri qeqertaaqqamut inoqanngitsumut tassunga niusimavoq, canadamiut sakkutuut sapaatip akunnerata siuliani tamaaneereersullu.

Taama pisoqarmat danskit ambassadøriat nalunaarfigineqarsimavoq. Canadamimi nutaarsiassaqartitsiviit iliuuseq ima paasivaat, canadamiut qeqertaq taanna ilungersorlutik pissarsiariniaraat.

Qeqertannguaq taanna nunamut sorlermut atanersoq Danmarkip Canadallu 1973-imili assortuussutigilerpaat. Danskit canadamiullu paarlakaajaallutik erfalasulertarsimapput. Kisianni ikinngutigiittutut taamaaliortarsimapput, oqaluttuarineqarpormi, canadamiut erfalasulereeraangamik aallaqqilerlutillu puiaasamik whiskymik Canadian Club-imik imalimmik erfalasulerfiup sanianut ilisisarsimasut. Taavagooq danskit qeqertaaqqamut tikikkaangamik, namminnerlu erfalasortik ikkutereraangamikku, whisky taanna Gammel Danskimik taarsertarpaat.

Qeqertalli taassuma qutaarlooqisup assortuussutaanera aamma ilungersortoqarnarpoq. Tassami Canadap, Danmarkisuulli, soorlulu aamma USA Ruslandilu taamaaliortut, uppernarsarusuppaa, Qalasersuaq, maanna kikkunnilluunniit tikinneqarsinnaasoq, kia pigineraa. Nunat immallu issittut avannarliit sikueriartorneranni, tamaani umiarsuakkut angalaneq annertusinerulersussaavoq, tamatumalu kingunerisinnaavaa ikerasak amitsunnguaq taanna kia nakkutigisarissaneraa.