Hansip Qeqertaanik piginnittuunertik takutinniarlugu, Canadamiut takussutissanik katersuileruttorput.
Liberalit sinnerlugit Canadap inatsisartuini ilaasortaq Dan McTeague taama oqarpoq.
Dan McTeague illersornissamut ministerimut Bill Grahamimut allatsitut aamma atorfeqarpoq.
Bill Graham Danmarkiminngaanniit pisortatigoortumik akerlilerneqartumik qanittukkut Hansip Qeqertaaniippoq.
Hansip Qeqertaa pillugu isumaqatigiinnartoqarnissaa Canadamit piumasarineqarpoq.
Hansip Qeqertaa akerlilernertaqanngitsumik siornatigut atortarsimagitsik, Dan McTeague oqarpoq, ilanngullugulu isumaqatigiinniarnissanut tamanna ilaatigut tunngavilersuutiginiarneqartoq.
Sakkutuut imarsiortut umiarsuaaraataat Tulugaq ulluni makkunani Hansip Qeqertaata tungaanut ingerlaarpoq, sapaatip akunneri marluk pingasulluunniit qaangiuppata Hansip Qeqertaanut apuutissangatinneqarpoq.
- Erfalasoq Dannebrog ukiut tamaasa nutaamik taarseriartortarparput, ullunilu makkunani Hansip Qeqertaanik saqitsaassuteqarnermut tunngassuteqanngilaq, Tulukkami sakkutuut naalagaassa ilaat Alex Jensen oqarpoq.
