Hansip Qeqertaa pillugu FN-ikkoorlugu aaqqiisoqartariaqartoq

Hansip Qeqertaa pillugu Canadap Danmarkillu akornanni saqitsaannerup aaqqiiviginiarneqarnissaa FN aqqutigalugu aalajangersaavigineqartariaqartoq, nunatta folketingimut ilaasortaatitaata aappaata, Kuupik Kleistip oqaatigaa:

- Qalasersuup tungaanut imartap naalagaaffimmut sumut atanersoq ilisimatuussutsikut misissorneqaleruttorpoq, taakkualu FN-ip aqqutigalugu aalajangersaanissamut aallaaviusussaapput, Kuupik Kleist oqarpoq. Nangillunilu:

- Canadap Hansip Qeqertaanut soqutiginninnini takutereerpaa, isumaqarpungalu Kalaallit Nunaanit sakkortoqataanik takutitsisariaqarpoq.

Nunatta folketingimut ilaasortaatitaata aappaa, Siumumeersoq Lars-Emil Johansen Hansip Qeqertaa pillugu oqaaseqarumanngikkallarpoq, oqarlunili nunatta naalakkersuisui eqqumanerusariaqartut, aaqqiissuteqarniarnernullu akuunerusariaqartut.

Dansk Folkepartiip nunanut allanut oqaaseqartartuata, Søren Espersenip piumasaraa, ministeriuneq Anders Fogh Rasmussen tamanna pillugu aaqqiiniartariaqartoq, Canadallu premierministeriata Paul Martinip saaffigineqarneratigut tamanna pisinnaasoq.

Kuupik Kleistilli aamma oqaatigaa naalagaaffiit peqatigiit aqqutigalugit aaqqiisoqartariaqartoq:

- Una isumaqatigaara naammassineqartariaqartoq, ukiorpassuit saqitsaassutigineqarnikuummat, isumaqarpungali FN-ip taassumunnga inatsisai pitsaalluinnartuusut, taakkualu naapertorlugit isumaqatigiinniarnerit aaqqinniarneqartariaqarput, Kuupik Kleist tunngavilersorpoq.