Hansip aalajangernera Aleqap uggoraa

Simumut ilaasortaasimasup, Hans Enoksenip, partiimit tunuarnissani ippassaq aalajangiuppaa. Nammineq oqarpoq, arlalinnik peqquteqarluni, Aleqa Hammondilli angutaataata, Tom Ostermannip, Aalisarnermut, Piniarnermut Nunalerinermullu Naalakkersuisumut, Karl Lyberthimut, immikkut siunnersortinngornera, pissutaanerpaavoq.

- Soorunami uggoraara, isumaqarpungalu Hans Enoksen Siumumut assorsuaq pingaaruteqartoq, Aleqa Hammond oqarpoq.

Aammali ugguarpoq, tassami isumaqarami Hans Enoksen suli tunniussassaqartorujussuusoq.

Hans Enoksenilli partiimit tunuarnera Naalakkersuisut siulittaasuata aamma ataqqivaa. Partiimut ilaasortaarusunnerluni nammineq aalajangissavaa, Aleqa Hammond oqarpoq, aammali ima oqarluni:

- Malugisinnaasimavara Hansip partiimut sulinera tunniusimaneralu piffissaq kingullermi allanngoriaateqarsimasoq, tassa Inatsisartut siorna upernaakkut inississornitsinninngaanniit ukiakkut ataatsimiinnerup ingerlanerani ataatsimiititalianut ilaasortaajumasimanngilaq, taamaattumillu toqqaannartumik sunniuteqarsinnaanera aamma killeqarsimalluni, Aleqa Hammond oqarpoq, nangillunilu:

- Tassa pingaaruteqarpoq Nunatsinni Naalakkersuisut ingerlaffitta, neriorsuutigisattalu piviusunngortinnissaannut, nukiit atussallutigik. Aamma pingaaruteqarpoq ilaasortaqassutsitta eqqarsaatigalugu soorunami inuiaqatigiinnit tunuliaqutserneqarnerput aallaaviusimassammat.

Naalakkersuisut siulittaasuat, Aleqa Hammond, Qanoruumut ippassaq taama oqarpoq.