Hans Rafaelsenimut eqqaaniut: Annertuumik maligassiuisuuvoq

Naalakkersuisup Peter Olsenip sisoraatinik ujakkaartartutoqaq suliniuteqarujussuarneranut ataqqiniarpaa.
Hans Rafaelsen angerlarsimaffimmini januaarip 30-ani eqqissivoq. Toqqorsivimmit assi Assi © : KNR
Allattoq Christine Hyldal
februaarip 24-at 2023 12:41
Nutserisoq Connie Fontain

Nunatsinni sisoraatinik ujakkaartarnermi ataqqinarnerpaat ilaat januaarip ulluisa 30-anni eqqissivoq.

Hans Rafaelsen kræftimik katsorsarneqarsinnaanngitsumik napparsimareerluni, 69-inik ukioqarluni toquvoq, ilaqutai KNR-imut taama nalunaaruteqarput.

Naalakkersuisup, Peter Olsenip sisoraatinik ujakkaartartutoqqamik eqqaaniuteqarnermini taassuma suliniuterujussuarsimanera ataqqiniarpaa:

- Hans Rafaelsen nulianilu Karen Mina sisoraatinik ujakkaarnermi nammineq kajumissutsiminnik siuarsaasuupput sunniuteqataanerpaanikuullutillu, pingaarnertut Aasianni sisorartartut peqatigiiffianni ASP-mi, kulturimut timersornermullu naalakkersuisoq, Peter Olsen (IA) oqarpoq.

- Hansi ukiut 50-it sinnerlugit sisoraatinik ujakkaartartuusimavoq aammalu ukiuni 50-ingajanni Kalaallit Nunaanni nammineq kajummissutsiminnik suliaqartuni malunnaataanerpaasimavoq, inuusuttunut timersornikkullu siuarsaasuunermini sunniuteqangaatsiarnikuulluni. Hansi sisoraatinik ujakkaartarnermini timersortarnerminilu siuarsaasuunermini timersornermik kivitseqataasuuvoq annertuumillu maligassiuisuulluni.

Hans Rafaelsenip timersornerup namminerlu kajumissutsimik suliaqarnerup iluani arlaleriarluni ataqqinaaserneqarnikuuvoq. Ilaatigut timersornerup silarsuaani suliaqarsimanini pissutigalugu Faxe-legatimik annerpaamik 2011-mi nersornaaserneqarpoq.

Hansi nulianilu 2022 oktobarimi Maligassiuisut Showimi aamma nersorniarneqarput. Bernhard Olsenillu sisorartartut kattuffianneersup Hans Rafaelsen nulialu nunatsinni sisorarnerup ineriartornerani malunnaatilimmik sunniuteqarsimaneranik qujassuteqarfigaa.

- Sisoraatinik ujakkaartartorpassuit tunngavilersortarsimavai tamannalu takussutissartarivaa ASP-mi sisoraatinik ujakkaartartut nunatsinni qaffasissumik inissisimanerannut allaallumi sineriammut siaruaannikuupput aammalumi nunanut allanut, naalakkersuisoq Peter Olsen oqarpoq.

- Hansip inuttut ilisimaneqaatigaa kikkunnit tamanit inissaqartitsisoq, qiimasoq, kaammattuisoq, anguniagaqallaqqissoq ataatsimoortitsillaqqissorlu. Hansip ASP-imi ilaasortanut oqariartuutigisarsimasaata ilagisimavaa, angusarissaartoqarpat tamarmik nuannaarutigissagaat, angusarissaarneranullu ilaasortat tamarmik pisooqataasut aammalu ataatsimoornikkut ikioqatigiinnikkullu pikkorissunik pilersitsisoqarsinnaasoq, Peter Olsen oqarpoq.