Hans Rafaelsen nersornaatisivoq

Imeruersaasiorfik Faxe Kondi Timersoqatigiit kattuffiannut 1971-mi aningaasaliisunngorpoq. Aningaasaliisuunermi saniatigut Sungiusaallammak, Siulersuillammak aamma Timersullammak check-imik tunissuteqarfigisarsimavaa.

Nersornaatinik taakkunannga tunineqarsimasut sisamat nittartagaq atorlugu taaneqarsinnaasimapput. Taaneqarsinnaasut tassaasimapput Michael Binzer sisoraatinik oqilaniuttartuusimasoq arlaleriarlunilu OL-mi peqataasarsimasoq, Rita Egede assammik arsarnermi meeqqanut inuusuttunullu suliniarluartoq aamma Helga Nielsen Inuit timersuutaanni siuttuusoq.

Hans Rafaelsen ukiorpassuarni Aasianni sisorartartut peqatigiiffiat ASP eqqaaneqartillugu avaqqukkuminaattarsimavoq. Aasiammiut sisorallaqqisut timersuummi tassani perortilluagai arlalissuupput ASP-llu illuutaani Ataarummi takussaajuartuulluni. Hans Rafaelsen T-41-p arsaattartuinut angutinut sungiusaasumut aasaq ikiortaavoq taakkulu angutit pissartanngorniunneranni bronzennapput.

Nersornaatisisup aqqa ippassaq unnukkut KNR TV-p aallakaatitassiaanni "Tamassa"-mi nalunaarugineqarpoq Hans Rafaelsen tuppallersimaqisoq sianerfigineqarmat. Toqqarneqarneranullu atatillugu check-imik 25.000 koruuninik aningaasartalimmik tunineqarpoq.

- Assorsuaq tuppallernarpoq aamma takorloorsimanngikkaluarpara taama pineqassallunga, Hans Rafaelsen oqarasuaatikkut Aasianniit oqarpoq.

Suli inuttaa piareersimavoq qasuttuilluni ASP-mik sullissinissaminut.

- Toqqarneqarsinnaasimasut aamma pilluaqqorusuppakka qutsavigalugillu uannik taasisimasut, Hans Rafaelsen oqarpoq.