Aqqaluk Lynge: Hans-Paviap naggueqatigiit inuit illersorneqalernissaat sulissutigisimaqaa
Naggueqatigiit Inuit pisinnaatitaaffiinut pingaartitsilluni inussiarnersuullunilu ICC-mi suleqatigisisarsimasaata Aqqaluk Lyngep oqaluttuaraa.
- Hans-Pavia Rosingip suliamini ICC-mi siulittaasuunermi nalaani angusaasa annerpaat ilagaat FN-imut ilaasortanngornerput. Taannalu aqqutigalugu FN-i ataatsimiititaliarpassuit tamaasa ICC-p peqataaffigilerpai.
- Nunat tamalaat akornanni uagut inuiannguit nunaqartut immaqa nunamik naalakkersorsinnaanngisatsinnik aqunneqarluta ingerlasuusugut, tassa nunat inoqqaavinik taaneqartartut, illersorneqalernissaanut suliaq aallartittoq Hans-Paviap peqataaffigisorujussuuaa, Aqqaluk Lynge oqarpoq.
AAMMA ATUARUK Hans-Pavia Rosing toquvoq
Inuit Issittormiut Siunnersuisoqatigiiffiat 1980-imi pilersinneqarmat Hans-Pavia Rosing præsidentinngorpoq, ukiunilu arfinilinni præsidentiulluni.
Ullumikkullu kalaallit inissisimanerannut sunniuteqarluarsimasoq, inussiarnersuullunilu ilakkuminartuusimanera eqqaamaneqaatigissagaa Aqqaluk Lyngep oqaatigaa.
- Sunniuteqarsimaqaaq, aamma uannut ikinngutitut inuttullu ajunngittuungami. Taamaattumik eqqaaneqarnera aamma tassuunakkut inuttut inussiarnersuullunilu nuannersuunera saneqqunneqarsinnaanngilaq suliaanut sunniuttarami, Aqqaluk Lynge oqarpoq.