Hans Lyngep qalipagai assilillugit ikaartitikkat iluarsaanneqartariaqarput
Ikaartitikkat siulliit 80-ikkut aallartinneranni, kingulliillu 90-ikkut naalerneranni nivinngartorneqarput. Ikaartitikkat tamarmik oqimaannermik ilaat appariartorlutik equjartulersimapput. Assilissat qeqqi sinaaniittuniit appasinnerulersimammata assassugatsialaat asiutinnagit iluarsaanniarneqalerput.
-Assigiimmik noqinneqarniassammata tunuisigut qerattaqqusissavagut. Sapinngisannguatsinnik iluarsiniarsaralugit Vecro-nik noqitsisulersorlugit. Meqqunik pitsaalluinnartunik ikaartitigaangamik oqimaaqaat, sanngiinnersaallu nalinginnarmik ikaartitikkanut sanilliullugit killormut ikaartigaallutik. Taamaammat ukiut ingerlanerini equjartuaartarput, Danmarkimi katersungaasivimmi Nationalmuseum-imi aanaveersaasartoq, Anne Marie Juul oqaluttuarpoq.
Taassuma suleqataatalu Irene Skals-ip, immikkut ilisimasatik atorluarniarlugit Kalaallit Nunaannukarsimapput. Ukiorpassuarni kattuffiit erfalasui siilikinik sanaat, qipiit itsarnitsat qiviunik sanaat, sinaakkutit kiisalu nipilersuutit iluarsaattarnerisigut immikkut ilisimasaqalersimallutik. Hans Lyngep qalipagai assilillugit ikaartitikkat iluarsaannerisigut, Nationalmuseum-imi suliarisartakkaminnit nutaanerusunik kiisami suliaqarsinnaalernerminnut aamma periarfissaqalernerarput.
-Uagutsinnut suliakkiissut alutorsaatigeqaarput. Ikaartitikkat Danmarkimut nassiunneqarnissaat ilimagisimangaluarparput, maannakkulli Kalaallit Nunaat misigisaqarfigisinnaanngorlutigu. Ikaartitikkat kusanaqisut sivisujaamik sulisariaqassapput, maannakkut marloriarluta sapaatip akunnerini tallimani suliarisarnissaat naatsorsuutigaarput. Ikaaritikkat tamarmik Kalaallit Nunaata oqaluttuarisaaneranut tunngasuummata, tamanna qanimut aamma paasisaqarfigisinnaalerparput. Taamatut misigisaqarsinnaagatta qujanaqaaq, kommunalbestyrelsip ataatsimiittarfiani meqqut ujalorlu ilillugit unillatsiarluni Irene Skals oqarpoq.
