Hans Lyngep eqqumiitsuliai uillarneranit tunissutigineqarput

Hansi naapikkakkuli nalunngilara suliai kalaallit kulturiata paasineqarnissaanut pingaaruteqartut. Hansimik ilisimannittut kisiisa eqqarsaatiginagit, ukiummi 22-t matuma siorna toqummat, naapitsisimasut ullumikkut ikilereerput. Isumaqarpunga ullumi inuusut paasisariaqaraat inuunerminni napitatik sumi sorlaqarnersut.

Inge Lyngep tunniunniagai tassaapput uulialimmik qalipakkat 20-t missaanniittut, Hans Lynge-p 1959-imiit 1988-ip tungaanut qalipagai. Inuiattulli saqqummersitsivissap siulersuisuinit tunissutit isummerfigineqartinnagit eqqumiitsuliat sorpiaat tunniukkusunnerlugit Inge Lyngep isertuukkallarpaa.

Ilaai uulialimmik qalipagaapput, qiperukkanik ilaqarlutik kiisalu titartakkat. Taakkualu saniatigut ilusilersuilernermini misiliutigisarsimasadi immaqa kingusinnerusukkut soqutigineqalersinnaasut, Hans Lyngep suleriaasaanik takutitsisut aamma Inge Lyngep tunniukkusuppai. Soqutiginnittut tamakkunannga takuniaaffissaqalernissaat pingaartikkamiuk.

Hans Lyngep aningaasaateqarfia sinnerlugu IngeLyngep tunissutai saqqummersitsivissap siulersuisuini siulittaasup Josef Motzfeldtip tulluusimaarutigeqai. Saqqummersitsivimmilu eqqumiitsuliat pitsaanerpaartaat saqqummersinneqartartussaammata tunissutigineqartut qujaruteqai, aallartisarnerminnilu aningaasanik katersiniarnerminni pitsaalluinnartunik katersugaatissaqalereerlutik oqarsinnaalernertik aamma nuannaarutiginerarlugu. Katersugaasivissaq aatsaat napparneqarpat tunissutissani tunniukkumaaramigit Inge Lyngep erseqqissarpaa.