Hans Lyngep aningaasaateqarfia kajumissaasiivoq
- Ukioq manna aningaasanik kajumissaasiinerup Kalaallit Nunaanni kulturikkut ingerlatsinerup siammarsimassusiata assigiinngitsorpassuuneranik takussutissaavoq, taama aviisimut Sermitsiamut oqarpoq Hans Lyngep aningaasaateqarfiani siulittaasoq Hans Lyngep uillarnera Inge Lynge.
Kajumissaatisisut siullersaraat taalliortoq polikerilu Moses Olsen, Mosesili Dronning Ingridip napparsimavissuani uninngammat paniata Akitsinnguaq Olsenip kajumissaat tiguaa.
Tulliuvoq qalipaasartoq qiperuisartorlu Miki Jakobsen, taassuma kajumissaarserneqarneranut tunngavilersuutaavoq eqqumiitsuliortutut nutaaliortutut siumukartuunera. Taamatuttaaq Kalaallit Nunaata aningaasassaanut titartaasussanngortitaanera.
Kajumissaaserneqartut pingajoraat 72-nik ukiulik isiginnaartitsisartoq quiasaarisartorlu Amos Egede, Amos Egede ukiuni arlalinni Nuummi isiginnaartitsisartut peqatigiiffianni ingerlatsisuusutut pingaaruteqarsimavoq. Filmilu ”Nuummioq” aappaagu takutinneqarpat isiginnaagassiami Aataajusaartoq takuneqarsinnaassaaq.
Kajumissaarserneqartut taakku pingasut tamarmik 10.000 koruuninik akissarsitinneqarput.
