Hans Lynge uatsinnut suli oqariartuuteqarpoq

Eqqumiitsuliortoq atuakkiortorlu, Hans Lynge, ukioq manna 100-liisussaagaluarpoq.

Kulturitsinnut pingaaruteqaqisoq pillugu atuakkiortoqarpoq, Det Kongelige Bibiliotekimi ullumi saqqummersinneqaqqaartussamik.

Hans Lynge pillugu atuakkiaq nunatsinni sapaatip akunnerata tulliani saqqummersinneqassaaq, tassa septembarip ulluisa arfernanni, inuttaata inuuiani, saqqummersinneqassammat.

Aningaasaateqarfiit assigiinngitsut, Hans Lynge-p Aningaasaateqarfia siuttoralugu, atuakkiamik saqqummersitsisuupput.

Atuagaq assigiinngitsunit oqaasertalersorneqarsimavoq. Assersuutigalugu inatsisartut siulittaasuannit, Jonathan Motzfeldtimit, atuakkiortumillu, Hans Anthon Lyngemit oqaasertalersorneqarsimalluni.

Atuakkioqataasut Hans Lynge pillugu allaaserinnipput, atuagarlu Hans Lynge-p allataanik siornatigut saqqummersinneqarsimanngitsunik aamma imaqarluni.

Eqqumiitsuliortoq tamatigoortoq, tamatsinnut suli oqariartuuteqarusuttoq, Hans Lynge-p Aningaasaateqarfiani siulittaasup, eqqumiitsuliortup nuliata, Inge Lynge-p oqaatigaa, qularutiginagulu Hans Lynge pillugu atuakkiami nutaanik paasissutissaqarumaartoq.

- Nunatta nunasiaasimanera ullutsinnilu pissutsit Hans Lynge-p qanoq takusimanerai paasisimaneraalu, atuakkiap ersersinniarsaraa, Inge Lynge oqarpoq.

Det Kongelige Bibliotekimi saqqummersitsinermi oqalugiartoqarlunilu eqqumiitsuliatut saqqummersillugit ilanngussaqartoqassaaq.

Nunatsinnut ministeriusimasoq, Knud Hertling, oqalugiartunut ilaassaaq, Hans Lynge-llu ernera, Niels Henrik Lynge, oqalugiassalluni.

Atuakkanik naqiterisitsisarfiup, Rhodosip, atuagaq ”Hans Lynge – kalaaleq kulturikkut aqqutissiuisoq” saqqumersippaa, atuagaq kalaallisut danskisullu oqaasertaqarluni saqqummersinneqassaaq.