Hans Lynge eqqaaniarneqarpoq
Qalipaasoq, atuakkiortoq, taalliortoq inuiaqatigiillu pillugit oqallinnermi peqataasarsimasoq Hans Lynge Københavnimi Det Kongelig Bibliotekimi ullumi nersorniarneqarpoq. Eqqumiitsuliortup inunngorneraniit ukiut 100-t, sapaatip akunnerata tulliani qaangiutissapput, tassungalu atatillugu, eqqumiitsuliortoq pillugu atuagaq nutaaq saqqummersinneqarpoq.
Hans Lyngep uillarnerata atuakkiornermi aaqqissuisup Inge Lyngep isertuutinngilaa atuakkap saqqummiuneqarnerani nuannaarnini:
- Saqqummersitsinnisarput qilanaarisimaqaara. Iluatsilluartutut oqarsinnaavunga atuagaq nuannerpoq, atuarnissaanut qilanaarluarisi, Hans Lyngep aningaasaateqarfiani siulittaasoq Inge Lynge taama ullumi oqarpoq.
Atuagaq ”Hans Lynge – kalaaleq kulturikkut aqqutissiuisoq” 350-inik qupperneqarpoq. Quppernerit assitaqarput atuagassartaqarlutillu. Eqqumiitsuliortoq tamatigoortoq atuakkiarineqarmat pappilissat pitsaasut atorneqarsimapput. Kalaallit kulturiat eqqartorneqartillugu Hans Lynge ungaqqunneqarsinnaanngilaq.
- Eqqumiitsuliarisartai pitsaalluinnartuupput. Hans Lynge siuarsimasuugami sutigut tamatigut aqqutissiuisarpoq. Nammineq paasisani pigiinnarnagit inunnut allanut tunniukkusuttarpai, atuakkiornermi aaqqissuisut ilaat nunatta oqaluttuarisaaneranik ilisimasalik Einar Lund Jensen taama oqarpoq.
Einar Lund Jensenip atuakkioqataata eqqumiitsuliortup Bodil Kaalundip eqqaavaa Hans Lynge eqqumiitsuliortuusoq tamatigoortoq. Tamanna atuakkami takuneqarsinnaavoq:
- Atuagaq qupperartillugu siornatigut eqqarsaatigisimanngisaannakkakka takusuusisarpakka. Taamaammallu Hans Lynge tamatigoortuulluni eqqumiitsuliortartuusoq oqarsinnaavunga Bodil Kaalund oqarpoq.
Taassuma Hans Lynge peqatigalugu 70-kkunni Nuummi titartaasarfik aallarnisarpaa. Titartaasarfik taanna ullumikkut Nunatsinni Eqqumiitsuliornermik Ilinniarfittut atorpoq. Inuusuttut ilaat Hans Lyngemit ikiorneqarluni tusaamaneqalersoq Jessie Kleemann ima oqarpoq:
Hans Lyngep ataqqinaatitut ilaasortaaffigisaani Tuukkaq Teaterimi isiginnaartitsisartutut Jessie Kleemann ilinniarpoq. Atuakkap saqqummerneranut atatillugu Hans Lyngep immiunneqarneri Tuukkaq teaterimi pigineqartut tamarmik Hans Lyngep aningaasaateqarfianut tunniunneqarput.
