Hans Jukku Showeqaqqilerpoq
Hans Jukku Noahsenip aliikkusersuinermini suleqatigaa ukiorpassuarni ikinngutini Nukannguaq Geisler. Taakku marluullutik ukiut ingerlaneranni inuppassuarnik qungujulaartitsisarsimapput. Quiaasarinertik manna qulequtserpaat "Hans Jukku Show - Sorsunnersuaq Kingulleq".
Taanna siullermik juunip 29-at 30-allu Katuami takuteqqaarneqarpoq maannalu tallimanngorneq septemberip 14-at aamma arfininngorneq 15-at takutinneqartussanngorpoq. Unnialu aliikkusersuinerit taakku assigiinngisaannartut.
- Apeqqutaasaqigami ulloq taanna qanoq misigisimaneq. Aliikkusersuinerput torrutiinnakkamik pisarpoq taamaattumik aamma apeqqutaasarpoq inersuarmi isersimasut qanoq innerat, Hans Jukku Noahsen oqarpoq.
Hans Jukku Show-eqarneranilu inuit ilisarnartut nipaannik ilaarsineq Hans Jukkup tusaamasaassutaa avaqqunneqarsinnaanngilaq.
- Inuit nuimasut issuartarpagut kiisalu immaqa nuimannginnerit, nunaqqativut ilaquttavut kammalaatigut allallu, Hans Jukku Noahsen aamma Nukannguaq Geisler oqarput.
Illakatannaversaasiullugu aliikkersuisartut taakku marluk aamma nipilersullammaasut erinnanik atuisarumaarput.
- Alakkaaniarisi, sajulereerpugut, ikinngutigiit illariarput.