Hans-Henrik Suersap aataqqeeqqeeqqiimi ilisimasassarsioqataanera isiginnaartitsissutigigaa
Nunatta Isiginnaartitsisarfiani inersuarmut isiginnaartitsisarfimmut tarrajoqisumut iseraanni inngerpalaaq kisimi tusarsaavoq.
Isiginnaartitsisartut marluk tassaasut Hans-Henrik Suersaq Poulsen aamma Kuka Fleischer qangarnisanik atisaqartut inersuarmiipput.
Isiginnaartitsisarfiup tarrajoreeqisup qullii qamipput, qulliillu qalipaatigissaaqisunik qinngornillit kisimik ikumalerlutik.
Isiginnaartitsineq aallartippoq.
Isiginnaagassiaq piviusulersaarutaasoq
Hans Hendrik Suersaq Arnarulunnguarlu qallunaanik nunatsinni ilisimasassarsiortunik arlalinni angallassisartuusimasut isiginnaagassiami pingaarnertut sammineqarput.
Arnarulunnguaq Thulemi 1921-mit 1924-mut ilisimasassarsiornermut peqataavoq. Hans Hendrik Suersaq kalaallini siullersaalluni ilisimasassarsioqataavoq, tallimariarlunilu ilisimasassarsioqataalluni.
Taassumalu kinguaavata isiginnaartitsisartup Hans-Henrik Suersaq Poulsenip una isiginnaagassiaq aallartippaa.
Tamannalu tulluusimarutigisorujussuullugu KNR-mut oqaluttuarpoq.
Hans-Henrik Suersaq Poulsen.
- Inuttaaffigalugu isumaqarsuaarpoq, aataqqeeqqeeqqiimma oqaluttuarsartaa qanillivillugu paasisaqarnarsuaarpoq. Siullermik pilerigisarnikuugakku inuk kisima isiginnaagassiariniarlugu. Kisianni Vivikkut Susannep Nunatta Isiginnaartitsisarfiarmiukkullu torrallallugu isiginnaagassiaraat.
Aamma Kuka Fleischer isiginnaagassiami peqataavoq. Taassuma Arnarulunnguaq inuttaaffigaa.
Aamma taanna qanganisanik atisaqarpoq. Annoraaqarpoq kamiisalu qalipaataat aappillaringaaramik soorlu tassa rosap qalipaataa.
Kuka Fleischer.
Arnarulunnguup nerisassiornissaq mersornissaq atisanillu ilaartuinissaq akisussaaffigigamigit ilisimasassarsiornermi pingaaruteqarsimaqaaq.
- Ima allaaserineqarneri iluamik tusarnikuunagit paasillugit inuttaaffigalugu pikkunaqaaq, assullu ataqqinarluni, Kuka Fleischer KNR-imut oqarpoq.
Taanna isiginnaartitsisartutut siorna naammassivoq. Taassuma isiginnaartitsissusiaq unamminartortaqartinnerarpaa.
- Ukioq kingulleq naammassinikooriarama maanna nammineernerujussuanni suleriusissakka eqqumaffigisassakka assigiinngitsorpassuupput, Kuka Fleischer oqarpoq.
Suleriaaseq allaanerusoq
Vivi Sørensen isiginnaagassiamik ilitsersuisuuvoq.
Isiginnaagassiallu kalaallinit suliarineqarnera pingaaruteqartoq, ilitsersuisoq oqarpoq.
Vivi Sørensen.
- Avataaneersut nunatsinni pisimasut oqaluttuariartorlugit tikittarput. Uagut nammineq oqaluttuariaaserput atorlugu massakkut isiginnaagassiuliorsinnaanitsinnut killinnerput pingaaruteqaqaaq, Vivi Sørensen oqarpoq.
Nunatta Isiginnaartitsisarfiani sisamanngornermi arfineq pingasut qeqqanut siullermeerluni takuteqqaarneqarpoq.
Nuummilu aggustip ulluisa 19-ianni 20-annilu takutinneqassaaq.
Isiginnaartitsissut aamma Danmarkimi illoqarfinni assigiinngitsuni takutinneqassaaq. Odin Teatretimi Holstebromiittumi takutinneqariarluni kulturmødetimi Morsimiittumi takutinneqaqqissaaq.
Taamaasilluni aamma Aalborgimi Aarhusimi Københavnimilu Kalaallit illuini takutinneqassalluni.
- Eqqumiitsuliortutut taamatut sulisinnaanerput namminiffaarik oqaluttuarerusutatsinnik aallaaveqarluta oqaluttuarisinnaanerput uanga assut iluarivara.
Isiginnaagassiaq piviusulersaarutaavoq. Piviusulersaarusiap piareersarnerani unammillernartortaqartoq ilitsersuisup oqaatigaa.
-Suleriaaseq alla atoratsigu tamatta pilersitseqatigiilluta suliarigatsigu, suliarinera tukalaarnikuuvoq. Uanga oqaqattaarlunga ”aaqqissaqqaarpoq aaqqissaqqaarpoq”. Uuma isiginnaagassiap piviusulersaarutaanera teknikkikkut pisariuvoq, ksianni nuanneqaaq, Vivi Sørensen oqarpoq.
