Hans Hedtoftimi ajunaartut nunatsinni eqqaassutissaqalerput

Ukiut 46-t qaangiutereerput umiarsuaq Hans Hedtoft Nunap Isuata kujataata-kitaani umiummalli. Ajunaartut 95-iupput, inuttat 40-t ilaasullu 55-t.

Ukioq manna januaarip qaammataani ajunaarsimasunut eqqaasutissaq Københavnimi nunat avannarliit killiit katersuuffiata eqqaani uleerneqarpoq.

Ajunaarsimasunut ilaqutaasut Danmarkimiittut suliniuteqarnerisigut tamanna piviusunngorpoq, ullumikkullu eqqaassutissaq nunatsinniittoq uleerneqarpoq.

Hans Hedtoftimi issimasut eqqaassutissaqalernissaat pillugu suliniuteqarsimasoq Oline Heilmann taama oqaaseqarluni eqqaassutissaq uleerpaa.

Erinarsoqatigiit NIPÉ tussiarput, Nuummilu kommunalbestyrelsi sinnerlugu Maliinannguaq Marcussen Mølgaard tikilluaqqusivoq.

Naalakkersuisut sinnerlugit peqqissutsimut naalakkersuisoq Asii Chemnitz Narup oqalugiarpoq, kinguninngualu ajunaarsimasunut ilaqutaasut ilaat Elna Egede aamma oqaaseqarluni.

Eqqaassutissaqalernissarli qanoq piviusunngorpa? Oline Heilmann ima oqarpoq:

- Tassa eqqarsaatigiuartarnikkuaara, sooq-una nunatsinni Hans Hedtoftimut ilaasunut eqqaassutissaqanngitsoq? Oline Heilmann aperivoq, nangillunilu:

- Taava utaqqiinnarnanga aallartippunga. Danmarkimi uleersinermi peqataareerlunga samungarsuaq pisoorama. Taava imminut oqarfigivunga: Nukittoqqikkuma aallartissaanga, tamannalu pivoq ukioq manna marsip ulluisa 29-anni. Nuannaaqaanga, oqilisimaaqaanga. Soorlu iliviiteqalerlunga ornittagassannik. Tuppallerneqaaq pilluaammernarlunilu inuppassuit najuummata, Oline Heilmann oqarpoq.

Oline Heilmannip arnaa Hans Hedtoftip umiunerani ajunaartut ilagaat. Eqqaasutissamik uleersereernerup kingorna, umiartortut angerlarsimaffianni kaffisoqatigiittoqarpoq.