Hans Hedtoft pillugu atuakkiulerput
Hans Hedtoft-ip 1959-mi umiusimanera pillugu atuakkiorniartoq, tusagassiortoq Lars Halskov , nunatsinneeqqammivoq, ajunaarsimasut ilaqutaanik oqaloqateqariartorluni.
1959-mi umiarsuaq Hans Hedtoft Nunap Isuata kujataata-kitaani ajunaarmat, ilaasut 55-it inuttallu 40-t ajunaarput. Ajunaarneq pillugu atuakkiassamut atatillugu Lars Halskov paasisassarsiorluni, qanittumi nunatsinniippoq, 1959-mi pisimasoq paasisassarsiorfigalugu, ajunaartunullu ilaqutaasunik oqaloqateqariartorluni.
Kalaallit Nunaannukarpugut, atuakkiassatta imarisinnaasai pillugit paasisassarsioriartorluta. Ajunaaqataasimasunut ilaqutaasut oqaloqatiginiarneruagut, oqaloqatigisarnerinilu malunnarpoq, umiarsuup ajunaarnerata kingorna, ilaqutaasut nalaataqarsimanermikkut timikkut tarnikkulluunniit ulloq manna tikillugu kingunerlutitsisimanerat, tusagassiortoq atuakkiorniartorlu Lars Halskov oqarpoq.
Hans Hedtoftip umiusimanerata kingorna ilaqutaasut nalaataqarnerlussimanertik pillugu oqaloqatiginninneq ajorsimapput, aatsaallu ukiuni kingullerni ilaqutariit iluminni eqqartuisalerneq pilersimalluni.
- Attortisimanartarpoq, ilaqutaasut oqaloqatigalugit, amerlanertigummi aatsaat siullerpaamik Hans Hedtoftip ajunaarnerata kingorna oqaloqatiginninneq misigisarmassuk. Lars Halskov oqarpoq, nangillunilu:- Amerlanerit misigisarsimasaminnik aniatitsereeraangamik oqiliallatsitsisutut misigisarput. Soorunami aamma ilaqarput, pisimasoq pillugu oqaluttuarusunngitsunik.
Hans Hedtoftip ajunaarnerani ilaqutaasut ilaat atuakkioqataaniartorlu, Johnny Lagoni, ataataa ajunaartut akornanniippoq. Taanna oqarpoq Hans Hedtoftip ajunaarnera pillugu atuakkiornialernertik qujanartoq. Nammineerluni aamma paaserusunnerarpaa, umiarsuup Hans Hedtoftip januaarip qaammataani aallartinneqarsimanera illersorneqarsinnaasimanersoq, umiarsuullu sananeqaataa issittumi tulluartuusimanersoq. Aamma umiarsuarni naalagaasartut ilaat oqaluttuartoq tusaasimavaa, oqartoq, Januaarip qaammataani Kalaallit Nunaanni umiarsuarmik angalanissaq taamanikkut ulorianarpallaartoq.
Hans Hedtoftip umiusimanera pillugu atuakkiassaq, umiarsuup ajunaarnerata kingorna ukiut 50-it qaangiunnerini atuagaq saqqummerumaartoq Lars Halskov oqarpoq.
