"Hans Hedtoft" nassaarineqanngilaq
Ilisimasassarsiorluni angalanermi Galathea 3-mi umiarsuaq ”Vædderen” atorlugu 1959-imi umiarsuaq ”Hans Hedtoft” inunnik 95-nik ilaasoqarluni umiusoq ujarneqaraluarpoq. Oqaatigineqarporli ippassaq Kap Farvelip imartaata naqqa aqqarfigineqaqattaaraluarluni umiarsuarmik kivisimasumik takussaasoqarsimanngitsoq.
Umiarsuup ”Vædderen”-ip umiuffiusimasutut ilimagineqartoq 40 kvadrat kilometeri angullugu ujaasiffigigaluarpaa tamatuma nalaa ilaatigut 1780 meterisut ititigivoq, naqqanili umiarsuangasumik takussaasoqanngivissimasoq erseqqissaatigineqarpoq.
- Imaassinnaavoq takussutissaqarsimasinnaagaluartoq qularnaatsumilli Hans Hedtoftingasinnaasumik nassaanngilagut, umiarsuup naalagaa Carsten Schmidt aviisimut Jyllands-Postenimut oqarsimavoq.
Galathea 3-mi ilisimasassarsiortoqarnerani umiarsuup Hans Hedtoftip ujaarinissaa siunertami pingaarnerutinneqanngilaq, umiarsuulliuna ”Vædderen”-p aqutsisoqarfiata umiarsuup tamatuma nalaaniinnera iluatsillugu tamanna periarfissiissutigigaa.
