Hans Enoksenip ukiortaami oqaaseqaataa
-Aatsitassarsiornermik uuliasiulersinnaanermillu siunissami isertitaasarumaartussat annertunerpaamik Kalaallit Nunatsinni kaaviiaartinneqarnissaat qulakkeerneqartariaqarpoq. Tamatuma saniatigut isaatinneqarumaartussat kingulissavut eqqarsaatigalugit isumatusaartumik aaqqiivigisariaqarpavut. Isaatinneqalerumaartussat atulussinnarneqassanngillat, taamaalioraluaruttami inuiaqatigiit aningaasaqarnerat ajalusuussaaq. Tamanna pinaveersimatinniarlugu aningaasaateqarfimmik pilersitserusuppugut, immertuassavarpullu Kalaallit Nunaata aningaasatigut imminut napatissinnaalernissaata tungaanut. Tassunga tunngassuteqartoq Naalakkersuisut Inatsisartunut upernaaru saqqummiunniarpaat.
Naalakkersuisut siulittaasuat Hans Enoksen taama oqarpoq.
Danmarks Radiop aallakaatitaa piviusulersaarut, ”Kalaallit Nunaanniit qimarranneq” pillugu oqallinneq Naalakkersuisut siulittaasuata oqalugiaammini aamma tikippaa – tassa sumiginnaanerit, kaannerit, kinguaassiuutitigut atornerluinerit, imigassamik atornerluinerit qimminillu qimuttunik naalliutsitsisarnerit pillugit oqallinnerit eqqaaneqarput.
-Soorunami ajornartorsiutit tamakku tamatsinnit pigineqanngillat, nunarsuarmioqatittali uatsinnut isiginnittaasiat ajoraluartumik assigiiaaginnalersarpoq. Taamaakkaluartoq inuiattut nukittorsarnissarput pisariaqartoq aamma nassuerutigisariaqarparput.
Inuiaqatigiit akornatsinni ajornartorsiuteqarnerput miserratigisinnaanngilarput. Tamakku toqqorterniarsarinngilavut. Nikallortariaqanngilagulli –kikkulluunniit ajornartorsiuteqarlutik nassuerutigigunikku, ikiorneqarnissartillu kissaatigigunikku, ikiorneqarsinnaapput, Hans Enoksen oqarpoq.
Namminersornerullutik Oqartussani kalaallinik departementchefeqalernissamut oqallinneq pillugu Naalakkersuisut siulittaasuat oqarpoq, departementchefit Naalakkersuisunut qaninnerpaatut siunnersuisartuummata eqqaamasariaqaripput, taamaammat departementchefit innuttaasunut paasinnillutillu tusarnaarsinnaanissaat pingaaruteqartoq. Kalaallisut oqaasilinnik pisortaqarnissaq Namminersornerullutik Oqartussat suliffeqarfiutaanni sapinngisamik anguniarneqarnissaa ilutigalugu aamma kaammattuutigaa.
Oqaaseqaataa uani takoqqissinnaavat:
