Hans Enoksenip oqalugiaataa illuatungiliuttut pikkunaagaat
Inatsisartuni ilaasortani illuatungiliuttut Atassummeersoq Finn Karlsen aammalu Demokraatineersoq Per Berthelsen Naalakkersuisut siulittaasuata ukiortaami oqalugiaataani Asiami ajunaarnersuarmi eqqugaasut eqqaasimanngimmagit ippigineqarpoq.
Finn Karlsen Atassummeersoq siulliulluni ima oqarpoq:
- Nalliuttut nalaani kangiani ajunaarnersuarmut tunngasumut eqqaasaqanngivimmat oqalugiarnerminut. Pinngitsoornani ajunaarneq pillugu ukiortaami oqalugiaamminut ilanngussisussaagaluarpoq. Soorunami misiginneqatiginninnerput nittarsaallugu aningaasanik ikiuutissanik tunniussaqarpugut, kisianni aningaasanik tunisinnginnermilluunniit mamiagineraara eqqaaneqanngimmata ukiortaami oqalugiaammi.
Finn Karlsen taamak oqarpoq. Demokraatit siulittaasuat Per Berthelsen Hans Enoksen-ip oqalugiaataanut aamma mamiasuuteqarpoq.
-Nunatsinni Naalakkersuisut siulittaasuata nunarsuarmi ajunaarnersuarni taamak annertutigisoq, tamanillu attuiinnarani aamma eqquitigisoq sumilluunniit oqalugiaammini taasimanngimmagu, tamanna tupinnarluinnartutut isigaara.
Demokraatit siulittaasuat Per Berthelsen taamak oqarpoq.
Naalakkersuisut siulittaasuat Hans Enoksen isumaqarpoq ajunaarnersuarmik eqqugaasimasut misiginneqatiginnissummik takutitsivigisimallugit.
- Toqqaannartumik eqqaannginneranut pissutaavoq, juullip kinguninnguatigut Naalakkersuisut misiginneqatiginneqataallutik aammalu aningaasanik tapersiissuteqarlutik ikiuupput. Oqariartuutigalugulu taamatut pisoqarnera uagutsinnut inuiannut Kalaallinut annertuumik misiginneqataanermik kinguneqartoq. Taavalu neriulluta eqqorneqartut pitsaasumik ikiorneqarnissaanut ikiuukkusulluta nalunaaruteqarluta.
Aamma Nunatsinni ulluni marlunni erfalasut qiteqqusimatippagut. Oqalugiaat aamma immiunneqarpoq, allanngortinneqarsinnaanilu saqqummiunneqarluni. Hans Enoksen naggasiivoq.
Nunat avannarliit sisamaasut tassa Norge Sverige Danmark aamma Kalaallit Nunaat ataatsimoorlutik misiginneqatiginnissummik allakkamik allagartik aqagu nassiunniaritsik, Naalakkersuisut siulittaasuata Hans Enoksen-ip ilanngullugu oqaatigaa.
