Hans Enoksen ulapingaatsiassaaq

Hans Enoksen ullumikkut ulapingaatsiassaaq.

Inatsisartut ataatsimiilernerisa ammarneqarnissaata saniatigut naalakkersuisoqarfiit arlallit allanut oqartussaaffigisassanngorlugit tunniutissavai.

Oqartussaaffinnik tunniussuinerit pissapput, qinikkat akornanni qaammatini kingullerni eqqissiviilliortoqangaatsiartoqareersorlu, pisorpassuillu kingunerisaannik naalakkersuisut siulittaasorigallagaata Hans Enoksenip oqartussaaffinnik tigusereernerani.

Inatsisartut ataatsimeereerpata ualeru nalunaaqutaq sisamat missaanniugunartoq qinikkat Namminersornerullutik Oqartussat kantinani naapissapput, Hans Enoksenip siullermik Ineqarnermut Attaveqaqatigiinnermullu naalakkersuisoqarfik parteeqamminut Jørgen Wæver Johansenimut tunniutissavaa, Avatangiisinut Pinngortitamullu naalakkersuisoqarfik Inuit Ataqatigiinneersumut Asii Chemnitz Narupimut tunniutissavaa kiisalu Atassutip siulittaasuanut Finn Karlsenimut Aalisarnermut Piniarnermullu naalakkersuisoqarfik tunniutissallugu.