- Tatigineqanngikkuma qinersisoqassaaq, naalakkersuisut siulittaasuat Hans Enoksen Sermitsiaq naggat gl-imut sisamanngornermi novembarip ulluisa qulingiluaanni taama oqarpoq, aalisartunillu marlunnik ikiuisimanini aalisarnermut inatsimmik unioqqutitsinnginnerusoq erseqqissaatigalugu.
- Aalisartut marluk ikiorsimavakka, ikiorneqarsimanngitsuugunik inuussutissaarussimassagaluarput. Ajortuliunngilanga aamma ernumassutissaqanngilanga, Hans Enoksen oqarpoq.
Inatsisartut kukkunersiuinermut ataatsimiititaliaatali qalleqqissarpaa Hans Enoksen aalisarnermut inatsimmik unioqqutitsisimasoq. Ataatsimiititaliami siulittaasup, Kristian Jeremiassenip, Atassummeersup, oqaatigaa, inatsisartut tamanna pillugu aalajangiiumaartut tamannalu pingasunngorpat piumaartoq.
Inatsisartut kukkunersiuinermut ataatsimiititaliaata isumaliutissiissutaa inatsisartut ukiaq manna ataatsimiinneranni sammisassaraat, tatiginninnginnermillu taasisitsinermik kinguneqarsinnaalluni.
