Hans Enoksen: Takanna aalisakutsoorniaritsi!
- Avannaani qaleralinniarneq taama sakkortutigisoq aalisartut ilaasa allamut sangutilaarsinnaaneri ajoqutissartaqanngilaq, siunnerfigineqarpormi avannaani qaleralittassat affaannanngortinneqassasut, tamannalu qaleralinniartunut eqquissaaq ajornartorsiortitsillunilu, taamaattumik naalakkersuisuni oqimaalutaasimavugut aalajangerlutalu immikkut akuersissuteqartoqassasoq Hans Enoksen oqarpoq.
Aalisartitseqatigiiffiup nammineerlunilu aalisariutaateqanngitsup North Greenland Seafoodip naalakkersuisuniit immikkut akuerineqarluni 1000 tonsinik saarullittassinneqartumut atatillugu oqallittoqalermalli aatsaat siullerpaamik Hans Enoksen sooq akuersisimanerminnik maanna oqaaseqarpoq. Taassumalu piginneqatigiinnik nutaanik periarfissiisoqarnissaa tapersersornerarpaa.
- Oqaatigereerpara inatsisit malitassat malinneqarput naak oqaluttoqaraluartoq inatsisinik unioqqutitsisoqartoq, illersugaareerput, periarfissaqareerput, aamma qinnuteqarnissaminnut, aalisartuiillu taakkua tupigaara taamatorujussuaq qassiiliuutaatigimmata, aamma pisassaqanngitsut kikkulluunniit aalisartut umiarsuaateqarsinnaanngillat, pisassaminnik qulakkeerinnikkunik soorunami ineriartortitsinissaminnut aatsaat aallartissinnaapput, Hans Enoksen oqarpoq.
Taanna oqarfigaarput aalisartut pineqartut malersorniaannarlugit malersorneqanngitsut periuserli pineqartoq, kiisalu Finn Karlsen radiokkut oqarsimasoq tamatigut maleruagassat malinneqartariaqanngitsut taakkulu avataatigut ilaanni naalakkersuisut periarsinnaasariaqartut.
- Naalakkersuisut qanoq iliuuseqarsinnaangippata taava sooq naalakkersuisoqassaagut? Akivoq.
Ilutigitiinnarlugu aperaarput ilisimaneqartoq kalaallit ilaat savalimmiormiunik ikiorserlutik aalisakkanik avammut tunioraasut, taamaattoqarsimappallu aalisartuiit nunatsinneersut kisimik pineqarsimanavianngitsut.
- Oqaatigereerpara malitassat malinneqarsimappata taava aamma allanik piginneqateqarsinnaanerit periarfissaqareerput kisianni piumasaqaataavoq procentit ima amerlatigisut nunaqavissuussapput aalisartitseqatigiiffik taperserneqassappat, tassa malitassat malinneqarsimapput tassani aamma, taama oqarpoq Naalakkersuisut siulittaasuat Hans Enoksen.
Aalisartitseqatigiiffimmut aalisariutaateqanngitsumut saarullittassiissutigineqartut 1000 tonsit 15 millioner koruuninik naleqarput.
