Hans Enoksen: Taasissussisartut ingerlaannaq ilaasortaajunnaarlik
Siumup inatsisartuni ilaasortaatitaannit siunniunneqarnikuugaluarpoq, inatsisartuni ilaasortat taasissussisarsimasut politiinut suliassanngortillugit tunniunneqassasut, tamannalu unitsinneqarpoq innuttaasut ilaat politiinut suliassanngortitsilluni tunniussereermat.
Ippassaq marlunngornermi januaarip 13-iani pisumi Siumut inatsisartuni ilaasortaatitaasa ataatsimiinneranni tamanna aalajangerneqartoq, Hans Enoksenip oqaatigaa.
Inatsisartut siulittaasoqarfiata aalajangernera ataqqigaluarlugu, ersarissassavara inatsisartuni ilaasortat ilaasortaqatiminnik taasissussisarsimasut Siumut iluani akuerinngilluinaqqissaaratsigu, Hans Enoksen oqarpoq.
Siunissami innutaasut oqartussaaqataanerisa innarlerneqannginnissaat qulakkeerniarlugu allannguutissamik Siumut siunnersuuteqarniarpoq. Inatsisartuni ilaasortat ilaasortaqatiminnik taasissussisartut ingerlaannartumik ilaasortaajunnaarsinneqarnissaat siunnersuutigineqarpoq, tamannalu inatsilerituut peqatigalugit siunnersuut suliarineqassasoq Hans Enoksen Siumup inatsisartuini ilaasortat sinnerlugit oqarpoq.
Inatsisartut siulittaasuata Ruth Heilmannip tunuartinneqarnissaanik Siumup inatsisartunut ilaasortaatitaanit siunnersuutigineqartoq, Siumup inatsisartuni ilaasortaatitaasa ataatsimiinneranni oqaluuserineqanngilaq.
Siumut inatsisartuni ilaasortaatitaasa inatsisartut ilaasortaqatiminnik taasissussisarsimanerat pillugu inatsisartut siulittaasuanik Ruth Heilmannimik isornartorsiunerat pisortatigoortumillu utoqqatsernissaanik piumasaqarnerat qatangiinnarpoq.
Siumut inatsisartuni ilaasortaatitaasa siulittaasuata Otto Jeremiassenip tulliatalu Isak Davidsenip tamanna piumasarigaluarpaat, tamannali Siumut inatsisartuni ilaasortaatitaasa ataatsimeeqatigiinneranni ippassaq pisumi qatangiinnarpoq.
Siumut inatsisartuni ilaasortaatitaasa ataatsimiinnerat sioqqullugu Otto Jeremiassen oqarpoq, inatsisartuni ilaasortat taasissussisarsimasut kingunerannik inatsisartut siulittaasuat inatsisartut ataatsimiinnissaanni tulliuttumi taarserneqassasoq. Tamannali piviusunngorsinnaanngilaq.
Siumut inatsisartuni ilaasortaatitaasa ataatsimiinnerisa kingorna aalajangiunneqarpoq, Siumut inatsisartuni ilaasortaatitaasa siulittaasuat pisut pillugit oqaaseqassanngitsoq, Siumut inatsisartuni ilaasortaatitaasa isumaat pisortatigoortumillu isummertarnerat, naalakkersuisut siulittaasuanit Hans Enoksen-imit saqqummiunneqartalernissaat aalajangiunneqarmat.
