Hans Enoksen Søren Alaufesen-imit akerlilerneqarpoq
Kommunit kattussuunnissaannut ulluliussaq, tassa januaar aallaqqaataa 2009 Kanukokap siulittaasortaavanit Søren Alaufesen-imit isumaqatigineqanngilaq, siulersuisullu nutaat sapaatip akunnerata tulliani ataatsimiilerpata nutaamik isummerfigineqassasoq, Søren Alaufesen oqarpoq.
- Kommunit arlalissuit kinguartitsisoqarnissaannik kissaateqarput. Aammattaaq Kanukoka-p ataatsimeersuarnerani aallartitat taama kissaateqarnertik oqaatigisarpaat, Søren Alaufesen oqarpoq.
Kanukokami siulittaasunngorlaap taamaalilluni borgmesterit 14-it sulissutigisimasaraluat qaninneruaa, tassa kattussuunneq aatsaat januaarip aallaqqaataani 2010-mi pissasoq.
- Kommunit kattuunnerisigut namminersornerullutik oqartussat akisussaaffiinik tigusisussaapput, tamannalu qanorpiaq aningaasartuutaassanersoq kommunillu nutaat akiligassat tungaatigut qanoq nammakkerneqassanersut paasisaqarfigeqqaarusupparput, Søren Alaufesen oqarpoq.
Naalakkersuisut siulittaasuata Hans Enoksen-ip ataasiaannarani naqissusertarsimavaa kommunit januaarip aallaqqaataani 2009-mi kattunneqassasut, ulluliussarlu taanna allannngortinneqassanngitsoq.
Kanukokami siulersuisunut ilaasortanngortut siulittaasortaartik isumaqatigineraat siulersuisut sapaatip akunnerata tulliani paasinarsissaaq.