Hans Enoksen: Siumup qinigassanngortitai pimoorussisuupput

januaarip 04-at 2005 14:51

Folketingimut qinigassanngortittut sisamat Siumup saqqummiussai, tassaapput, nunatsinnik pimoorussillutik sullisserusuttut,arnat, angutit, inuusuttut misilittagartuullu, taama Siumup siulittaasua Hans Enoksen oqarpoq.

Qinigassanngortittut ilagaat, peqatigiiffinni naalakkersuinermillu suliaqarnerminni misilittagaqarlualeriartortut, tassalu Siumup inuusuttaani siulittaasoq inatsisartunullu ilaasortaq, Doris Jakobsen 26-nik ukiulik aamma naalakkersuisumut allatsi, Ole Aggo Markussen 42-nik ukioqartoq.

Pingajuat tassaavoq, siornatigut nalaakkersuisunut ilaasortaasimasoq maannalu avatangiisinut pisortaqarfimmi atorfilik, Marianne Jensen 55-inik ukiulik, aamma nunarsuarmioqataanermi misilittagartuutut siulersuisuunernit oqaatigineqartoq.

Folketingimut qinigassanngortitat sisamaat tassaavoq, Siumut Partiimik pilersitseqataasoq maannalu folketingimut ilaasortaq Lars-Emil Johansen 58-inik ukioqartoq.

- Folketingimut qineqqusaarnissamut sassartitavut, naligiimmik qineqqusaartinneqassapput, qinersisartullu namminneq aalajangissavaat sorleq qinissanerlugu,

Hans Enoksen sassartitatik pillugit oqarpoq.