Hans Enoksen Simon Olsenilu

novembarip 08-at 2004 22:08

Naalakkersuisut siulittaasuat, Hans Enoksen, inatsisartut ataatsimiinnerata kingorna ualigaa radioavisimut oqarpoq aqagu marlunngornermi ulloqeqqata siorna nammineq kisimi aalajangissallugu aalisarnermut naalakkersuisoq, Simon Olsen, tunuassanersoq ataannassanersorluunniit.

Naalakkersuisut siulittaasuat, Hans Enoksen, inatsisartut ataatsiminnerat ulloqeqqata kingorna taamaateqqammersoq, erseqqinnerusumik oqaatigalugu tallimanut tanneq sisamat missaanni aperaarput naalakkersuisoq Simon Olsen qanoq pissanerlugu aalajangereersimanersoq. Hans Enoksenilu radioavisimut oqaaseqarpoq Atuagagdliutit ullumi radioavisimut eqquteqqammersut, tassani atuarneqarsinnaalluni Siumup politikikkut oqaaseqartartuata, Kalistat Lundip naalakkersuisut siulittaasuat ammasunik allaffigisimagaa periarfissat marluinnaasut, tassalu Simon Olsen nammineerluni tunuarsinaasoq imaluunniit naalakkersuisut siulittaasuata aalajangernissaq oqimaatsoq nammineq tigusariaqaraa naalakkersuisooqatini soraarsillugu, ullumilu ualigaa kingusissukkut Hans Enoksen akivoq:

- Suli aalajanginngilanga, kisianni aalajangersimasumik siummereerpunga, kisianni gruppitsinni erniinnaq ataatsimiissaagut, aqagulu ulloqeqqata missaani aalajangernera tamanut tusarliutissavara, tassa inatsisartut ataatsimeeqilernissaat sioqqulllugu. Simon Olsenimik isorinnissutit kukkunersuiunermut ataatsimiititaliap naliliineri sakkortuut nalilersoreerlugit uanga naalakkersuisutut kisima inatsisitigut tunngavissaqarpunga isumaga atussallugu aamma gruppima isummernera allaagaluarpalluunniit, Hans Enoksen qalleqqissaavoq, oqarporlu aalisarnermut naalakkersuisup sulinera qanimut malinnaaffigisimallugu aamma suliaminik ilisimatittuarmani, namminerlu isumaqarluni naalakkersuisup suliai ajunngitsumik nalilertarlugit aamma inuttut, Hans Enoksen oqarpoq, kisianni aalajangernini aatsaat aqagu tamanut ammasumik oqaatigisinnaallugu.