Hans Enoksen: Qulaajaasoqassanngilaq

Danmarki nunarput savalimmiullu pillugit naalagaaffiit peqatigiinnut sallusarsimanera namminersorneq pillugu isumalioqatigiissitami suliarineqassanngitsoq isummerfigineqassanngitsorlu naalakkersuisut siulittaasuat Hans Enoksen aalajangiivoq. Naimmersorneq pillugu isumalioqatigiissitaq danskinik nunatsinneersunillu ilaasortaqartoq qulaajaasussaanngitsoq Hans Enoksen oqarpoq.

Taamaasilluni Hans Enoksenni Jørgen Wæver Johansenimut illuatungiliivoq, taassumami Danmarkip iliuuserisimasaa ”sallu” namminersorneq pillugu isumalioqatigiissitami qaqilerneqassasoq kissaatigimmagu.

Hans Enoksen aamma isumaqarpoq Folketingimi Altantikup avannaani suleqatigiit nalunaarusiortitsinerat pissarsiffioqisoq pingaaruteqaqisorlu. Taamaammalu statsministeri januaarimi ataatsimeeqatigileruniuk eqqartorniarpaa.

Namminersorneq pillugu isumalioqatigiissitami siulittaasoq Kalistat Lund siulittasullu tullia Christian Majdahl isumaqatigiissutigereerpaat Danmarkip naalagaaffiit peqatigiinnut salluliortarsimanera qulaajarneqaranilu suliarineqanngitsoq.