Hans Enoksen: Qaanaarmiut suleqataassapput

Qaanaap kommunea naalakkersuisullu Qaanaaq komitemik, tassa suleqatigiissitamik pilersitsuisoqarnissaanik isumaqatigiissuteqarput. Suleqatigiissitap suliassaatut ulluni sisamani Qaanaamiinnermi isumaqatigiissutitik Naalakkersuisut siulittaasuata Hans Enoksenip nassuiarpai:

- Inuussutissarsiornermut, ilinniartitaanermut tunngasunik annertuumik suliniutissanik tunngaviusumik isumaqatigiissuteqarpugut. Minnerunngitsumik meeqqat atuarfiata nukittorsarneqarnissaa eqqarsaatigalugu.

Silaannaap allanngorneranik pissuteqartumik Qaanaami piniartutut inuussutissarsiuteqarnerup annertuumik sunnigaasimanera ataatsimiinnermi aamma tikinneqarsimapput.

- Aalisarnikkut annertuumik siuarsaasoqarnissaa kissaatigineqarpoq. Qeqertat eqqaani annertuumik qaleraleqarfeqartoq oqaatigineqarpoq, taassumalu atorluarneqarnissaa uagut soqutigisorujussuuarput, taamaattumillu Qeqertarmiut Qaanaarmiullu peqatigalugit aaqqissuussinissaq aqqutissiuunniarparput, minnerunngitsumik qeqertani periarfissat pitsanngorsarneqarnissaat anguniassavarput. Tassami piniarnerinnaq isumalluutigineqarsinnaajunnaarpoq, aamma aalisarnikkut periarfissat annertusarneqartariaqarnerat isumaqatigiissutigaarput.

Qaanaami imigassaq pillugu qanoq isumaqatigiissuteqarnersut aperaarput, akivorlu:

- Suliniutit pinaveersaartitsinissat, pikkorissartitsinissat katsorsaanissallu isumaqatigiissutigaavut. Oqaloqatigiinnerit naggataagut ajunngitsorujussuarmik ingerlalerput, taamaattumillu imigassap sivisuumik matoqqanissaa naatsorsuutiginngilara. Kissaatiginngilarput sivisuumik matoqqatitsisoqarnissaa.

Suliniutissat aallartisarneqartussat Qaanaarmiut qaqugu malugisinnaalissagaat aperaarput, akivorlu:

- Piaartumik taanna suliariniarparput, soorunami kissatigaarput sukkaasuumik aaqqinneqarsinaasut, aningaasallu Qaanaap kommuneata Namminersornerullutik Oqartussanut attartugai sulineq timitaqarluartutut aallassappat isumakkeerneqartariaqartut, taakkulu soorunami ilanngullugit Naalakkersuisuni erqqartoqqissaassavagut.