Partii Naleqqap siulittaasua Hans Enoksen partii siulittaasuattut tunuarpoq. Partii Naleraq tusagassiuutinut nalunaaruteqarluni taama paasissutissiivoq.Assi: KNR / Malik Brøns

Hans Enoksen partii siulittaasuattut tunuarpoq

Partii Naleqqap siulittaasua Hans Enoksen partii siulittaasuattut tunuarpoq. Partii Naleraq tusagassiuutinut nalunaaruteqarluni taama paasissutissiivoq.

Hans Enoksenip Partii Naleraq 2014-mi pilersippaa taamanili partiimi siulittaasuulluni. 

Hans Enoksen 2002-mit 2009-mut naalakkersuisunut siulitaasuuvoq, taamani Siumut sinnerlugu , qinigaaffinnilu marlunni inatsisartuni siulittaasuuvoq.

Hans Enoksen maanna inuttut peqquteqarluni pisariaqartissimavaa ullumikkumiit Naleqqami Siulittaasutut tunuassalluni. Partii Naleraq tusagassiuutinut nalunaaruteqarluni kaammattuuteqarpoq Hans Enoksen pisariaqartitsiffiani inuttut peqquteqarnera ataqqeqqullugu.

Ukiorpassuarni qasujaalluni sulinikuulluni, maanna inuttut peqquteqarluni pisariaqartissimavaa ullumikkumiit  Naleqqami siulittaasutut tunuassalluni, partii Naleraq tusagassiuutinut nalunaaruteqarluni taama allappoq.

Siulersuisuunerit Hans Enoksen  ukiuni amerlasuuni partiimi suliniuteqarsimanera aamma  inuttut kiisalu siulittaasuusimanera pillugu  qamannga qutsavigaat,

Hans Enoksen siulittaasutut tunuarneratigut Partii Naleraq immikkut ittumik ataatsimeersuartitsinissaa siunniunneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl