Hans Enoksen: Partii kinaluunniit suleqatigisinnaavarput

- Siumut tamakkiunneqaraluartoq ersarilluinnartumik inuiaqatigiinni imaaliallaannaq saneqqunneqarsinnaanngitsoq, Siumup ukiorpassuarni tunngavissiinini ingerlateqqissagaa tikkuussissutigineqarluni, Atassut ulloqeqqata siorna nalunaaqutaq qulinut oqaloqaloqatigalugu aallartissavarput, Hans Enoksen oqarpoq.

Atassut Hans Enoksenip isumasioqatigissavaa qanoq ingerlariaqqittoqarsinnaanersoq. Atassutikkut naalakkersuisooqatigilernissaat takorloorsinnaaneraa aperineqarami Hans Enoksen akivoq, oqaloqatigiinnerit soorunami ingerlanneqassasut, Atassut annertuumik aallaavigalugu oqaloqatigiinnerit ingerlanneqassasut, aamma naalakkersuisooqatigiinneq misilittareersimagamikku neriuutigaa naapissinnaanissartik.

- Partiit allat naapinnissarput kissaatiginngilluinnaqqissaarpaat, kisianni oqaatigissavara taama mattussineq akuerineqanngitsoq massakkut naqissuserneqarmat, taamaammat annertuumik oqaloqatigiinnissaq ingerlattariaqartoq, Hans Enoksen oqarpoq. Nangillunilu oqarpoq, mattussiniarneq Siumup siunertarinngilluinnaraa.suleqatigiissutissarpassuaqaramik inuiaqatigiit ataatsimut isigineqartariaqartut unnerpaa, una aallaavigineqarani kikkut pissaaneqarnerusariaqarnersut, taanna namminneq peqataaffigerusunnagu Hans Enoksen oqarpoq.

Inuit Ataqatigiillu naalakkersuisooqatigineranni avissaaqqimmata taakkunannga suleqateqalernissaq qunulliutinnginneraa aamma aperineqarpoq, akivorlu: - Tassa soorunami uagut siunnerfigut, naalakkersuisooqatigiinnermut tunngaviusut massakkut naammassineqartariaqartut aalajangiusimalluinnaqqissaarpavut.