Hans Enoksen Nunatta Ammeriviani pisortamut utoqqatserpoq
Tusagassiuutinut nalunaarut aatsaarluinnaq takkuttoq ima imaqarpoq.
"Piffissami kingullermi Nunatta Ammerivia A/S-mi Namminersornerullutik Oqartussanit 100 %-mik pigineqartumi aningaasatigut pissusissamisuunngittoqarneranik oqaatsit uppernarsaatissaqanngitsut saqqummiunneqartarput.
Ullumi Nunatta Ammeriviani siulersuisuni siulittaasoq Anders Brøns aamma pisortaq Michael K. Nielsen ataatsimeeqatigaakka.
Naalakkersuisut sinnerlugit Nunatta Ammeriviani aqutsisunut tamakkiisumik tapersersuinera oqaatigissavara. Pisortap Michael K. Nielsenip imaluunniit aqutsisut allat tatiginassusiat Naalakkersuisut kissaatigisimmangilaat qularineqalissasoq.
Naalakkersuisut sinnerlugit Michael K. Nielsenimut, ilaqutaanut Nunattalu Ammeriviani sulisunut piffissami kingullermi tusagassiuutitigut oqaluuserinninnerup ilungersunartumik kinguneranik akornusersuutaasut tamaasa utoqqatsissutigaakka.
Naalakkersuisut isumaqarput, Nunatta Ammerivia nunanut tamalaanut attuumassuteqartumik suliffeqarfiusoq kalaallillu qangaaniilli piniarnikkut ileqquusumik kulturiannik sorlaqarfeqartoq Kalaallit Nunaannut nutaaliasumut pingaaruteqartumik sinniisuusoq."
Naalakkersuisut Nunatta Ammerivianik piffissami aggersumi suleqateqarnerup nanginneqarnissaa qilanaaraat, ilaatigut tunisinermi tapiissutinut sipaarniutissat 2006-mut aningaasanut inatsisissamut siunnersuummut piniartutut inuussutissarsiornermut Nunattalu Ammerivianut kingunerisassaat mississueqqissaarneqassallutik. Tamatuma saniatigut Naalakkersuisut Nunatta Ammervia suleqatigalugu Canadamiut puisit amiutaannik pisisarnerup unitsinneqarneranik aalajangerneq upernaap ingerlanerani naliliiffigeqqissavaat."