Hans Enoksen: Nunaqarfimmiut akitsuutinik artukkerneqartariaqanngillat

Qamutit oqimaatsut qamuteralaallu akitsuuserneqarnissaanik Naalakkersuisut pilersaarutaanni, kujataani savaatillit eqqorneqannginnissaannik oqalunnermi, nunaqarfimmiut allat aamma eqqorneqartariaqanngikkaluarput, partii Naleqqamik pilersitseqataasoq, Hans Enoksen, taama oqarpoq.
februaarip 21-at 2014 08:05

- Akitsuutit sumiiffiit ilaannaannut atuutsinneqarsinnaanngillat. Nunatsinni immikkoortitsisoqassanngippat, avannaani nunaqarfinni aalisarnermi atorneqartut, nioqqutissanik assartuinermi allanilu atorneqartut akitsuutinik eqqorneqartariaqanngitsut isumaqarpunga, Hans Enoksen oqarpoq.

Hans Enoksenip aamma oqaatigaa, qamutinik oqimaatsunik akitsuusiinermi, nunaqarfimmiut annertuumik eqqorneqartussaassasut, tassami nunaqarfinni tamarluinnarni qamutit oqimaatsut, soorlu Kramerinik taaneqartartut, Pilersuisumit pigineqartut amerlasoorpassuummata, tamassuma malitsigisaanik Pilersuisup nioqqutissanik akitsuinissaa avaqqunneqarsinnaassanngitsoq.

- Akitsuusiinermi Pilersuisoq 1 million koruunit 2 miillionit koruunillu akornanni eqqorneqassasoq naatsorsuutigineqarpoq. Tamannalu nioqqutissanut soorunami malunniuttussaassalluni. Soorunami aamma nunaqarfinnut umiarsuartigut pajuttuinermi, qulimiguulinnik ilaasunik angallassinermi allatigullu nunaqarfimmiunut sullissinermi, qularnanngitsumik akit qaffasinnerulersinnaapput. Partii Naleqqamik aallartitseqataasoq, Inatsisartuni ilaasortaq Hans Enoksen oqarpoq.

Aningaasaqarnermut Naalakkersuisup, Vittus Qujaukitsup naatsorsuutigaa, akitsuusiinermi Nunatta karsia ukiumut 10 millionit koruuninik isertitaqartassasoq.