Hans Enoksen: nunaqarfiit missukutaasimanerannut akisussaaqataavunga
60-ikkunni nunaqarfinnik inuerusaasimanermut assingusumik nipaatsumilli politikerit maanna ingerlatsinerarlugit, ilinniagartuup Steen Jeppsonip oqarnera, Hans Enoksenip isumaqatiginngilaa.
- Nunaqarfinni illuliornerit, atuarfiliornerit, meeqqeriviliornerit aammalu timersortarfiliornerit katersortarfiliornerillu ukiuni makkunani pipput. Tassa G-60-ip nalaanit allaanerulluinnarpoq. Nunaqarfinni aamma siumukartoqarpoq. Nunaqarfiilli suli siumukarnerussappata, taava inuiaqatigiit tamatta ikiuuttariaqarpugut, tassami aningaasat amerlanersaat illoqarfinnut atorneqartarput, Hans Enoksen oqarpoq.
Taava naalakkersuisut kukkusimanernik taamaalillutit nassueruteqarpit?
- Kukkusimassaguma taanna nassuerutigissavara. Kisianni nunaqarfiit ineriartornissannut kommunit pilersaarusiorlutillu aningaasalersuinermi aaqqisuussisussaapput. Tassanngaanniillu naalakkersuisuinut qinnuteqartussaallutik, Hans Enoksen akivoq.
Atuarfiliorneq, peqqinnissakkut sullissineq angallannerlu Naalakkersuisuniit toqqaannartumik aningaasalersorneqartarput. Kisianni oqarputit, nunaqarfiit kommuninit akisussaaffigineqartut. Ilinnut assortunngilatit?
- Naamik. Oqaatigereerpara, kommunit pilersaarusiaat tunngavigalugit Naalakkersuisut nunatsinni ineriartortitsinermi peqataasussaasut. Nunaqarfimmiut kommunillu suleqatigiillutik saaffiginnittussaapput, taava uagut suliassaq ingerlateqqissavarput, Hans Enoksen uteqqiivoq.