Hans Enoksen: Nancy Pelosi-p tikeraarnera pingaaruteqartorujussuuvoq

Nancy Pelosi USA-mi Repræsentanternes Hus-imeersoq, Ilulissanut ippassaq unnukkut tikimmat naalakkersuisut siulittaasuata, Hans Enoksenip, tikilluaqquvaa.

Hans Enoksen isumaqarpoq, Pelosi-p tikeraarnera Kalaallit Nunaata avataanit isigineqarneranut pingaaruteqartorujussuusoq. USA-mik suleqateqarnerup suli pitsaanerulernissaa tikeraarnerup kingunerissagaa aamma naliliivoq:

- Tassa pingaaruteqartorujussuuvoq, inummik taama pingaaruteqartigisumik aatsaat tikeraartoqarpoq. Ulluinnarni inuunitsinnut tunngasut, pinngortitamik atuinerput minnerunngitsumillu aama silaannaap allangoriartornera taanna, pingaaruteqartorujussuuvoq taakkununnga tusartissallugu apuutissallugulu, taamaalilluni aamma nunarsuup sinneranut siaruaattussaavoq.

Nunarsuarmioqataasuninngaaniit paasineqarnerunissarput annertoorujussuarmik aqqutissiuunneqartussanngorpoq, tassa nuannersua, aamma tulluusimaarnaqaaq taama inissisimalluartigisunik nunatsinnut takkuttoqarmat, amerikamiunik suleqateqarnerput sakkortusiartormat tassuuna aamma ersersinneqarmat assorujorujussuaq nuannaarutigaarput.

Kalaallit Nunaata qanoq atorluarniartigissaneraa Naalakkersuisut siulittaasuat aperineqarpoq, akivorlu:

- Atorluassaqaarput, pingaartumik inuusaatsitta aamma pinngortitap qanoq mianernartiginera avammut tusarliunnissaanut qularinngilara annertuumik ikiussagaatigut.

Nancy Pelosi malittaalu tikimmata Ilulissani erinarsoqatigiit erinarsorput, tikeraartillu kiinaanni takuneqarsinnaavoq assorsuaq attortittut. Hans Enoksen oqarpoq, tamavimmik qamuuna attortillutik, tassami kalaalit soorpianngitsutut ilaatigut isiginiarneqartarmata, uani takutinneqarmat kalaallit qanoq aamma inunerissaartigisut, qanoq kusanartigisumik takutitsisinnaasut. Taama inissisimalluartigisunut takutillugu attortinnartorujussuuvoq, tulluusimaarnaq kalaaleqateqarluni taamaattunik, Hans Enoksen oqarpoq.